अमेरिकामा गर्भपतन औषधि विवाद: सर्वोच्चद्वारा हुलाकमार्फत मगाउन सकिने व्यवस्थालाई निरन्तरता
प्रकाशित मिति : २१ बैशाख २०८३, सोमबार
अमेरिकामा गर्भपतन गराउने औषधि हुलाकमार्फत पनि मगाउन सकिने भएको छ। अमेरिकाको सर्वोच्च अदालतले गर्भपतन गराउने औषधि ‘मिफेप्रिस्टोन’ टेलिमेडिसिन र हुलाकमार्फत प्राप्त गर्न सकिने व्यवस्थालाई अस्थायी रूपमा यथावत राख्न आदेश दिएको हो।
यो प्रशासनिक स्थगन अन्तिम फैसला भने होइन। यसले केही दिनका लागि हालकै व्यवस्थालाई निरन्तरता दिनेछ। अदालतले हाल औषधि उत्पादक कम्पनीहरूले दायर गरेका आपतकालीन निवेदनहरूको समीक्षा गरिरहेको छ।
यसअघि संघीय पुनरावेदन (अपिल) अदालतले उक्त औषधि स्वास्थ्यकर्मीको प्रत्यक्ष उपस्थितिमा मात्र लिनुपर्ने नियम पुनः लागू गर्ने निर्णय गरेको थियो। सो आदेशले गर्भपतन सेवामा पहुँच सीमित हुन सक्ने अवस्था सिर्जना गरेको थियो।
न्यायाधीश सामुएल अलिटोले जारी गरेको यो आदेश मे ११ सम्म लागू रहनेछ। उनले सम्बन्धित पक्षहरूलाई बिहीबारसम्ममा आफ्नो जवाफ पेश गर्न आग्रह गरेका छन्।
मिफेप्रिस्टोन उत्पादन गर्ने कम्पनीले आफ्नो निवेदनमा तल्लो अदालतको निर्णयले “समय-संवेदनशील चिकित्सा निर्णयहरूमा तत्काल अन्योल र अव्यवस्था” निम्त्याउने उल्लेख गरेको छ। औषधिको जेनेरिक संस्करण उत्पादन गर्ने कम्पनीले पनि उक्त निर्णयले देशभरका बिरामीको पहुँच अचानक रोकिन सक्ने चेतावनी दिएको छ।
कोभिड–१९ महामारीपछि महिलाहरूले टेलिमेडिसिनमार्फत यो औषधि प्राप्त गर्दै आएका थिए। अमेरिकी प्रशासनले सन् २०२३ मा नियम परिमार्जन गरी चिकित्सकलाई प्रत्यक्ष भेट्नुपर्ने अनिवार्यता हटाएको थियो।
अमेरिकामा गर्भपतनसम्बन्धी कानुनी परिवर्तनपछि औषधिमार्फत गरिने गर्भपतनको संख्या बढ्दै गएको छ। एक अनुसन्धान संस्थाका अनुसार सन् २०२३ मा भएका कुल गर्भपतनमध्ये ६० प्रतिशतभन्दा बढी औषधिमार्फत गरिएका थिए।