युक्रेनका प्रहरी प्रमुखले दिए राजीनामा, गोलीकाण्डको कारण खोज्दै गृहमन्त्री
प्रकाशित मिति : ६ बैशाख २०८३, आइतबार
युक्रेनका प्रहरी प्रमुखले राजीनामा दिएका छन्। राजधानी किभमा भएको एक घातक सामूहिक गोलीकाण्डपछि गस्ती प्रहरी प्रमुख येभहेन झुकोभले राजीनामा दिएका हुन्।
उक्त घटनामा संलग्न दुई प्रहरी अधिकारीको भूमिकालाई लिएर चर्को आलोचना भएपछि उनले पद त्याग गरेको बताइएको छ।
किभको दक्षिणी होलोसीइभ्स्की जिल्लामा एक व्यक्तिले सडकमा अन्धाधुन्ध गोली चलाउँदा ६ जनाको मृत्यु भएको थियो भने १४ जना घाइते भएका थिए।
गोली प्रहार गरेपछि ती व्यक्तिले नजिकैको एक सुपरमार्केटमा केही मानिसलाई बन्धक बनाएका थिए। अन्ततः प्रहरीसँगको दोहोरो भिडन्तमा उनी मारिएका थिए।
घटनापछि सामाजिक सञ्जालमा सार्वजनिक भएका दृश्यहरूमा केही प्रहरी अधिकारीहरूले सर्वसाधारणलाई छाडेर घटनास्थलबाट भागेको देखिएको थियो।
युक्रेनका आन्तरिक मामिला मन्त्री इगोर क्लिमेन्कोले सम्बन्धित अधिकारीहरूलाई निलम्बन गरिएको र उनीहरूको गतिविधिबारे अनुसन्धान भइरहेको बताएका छन्। यद्यपि, उनले दुई जना कर्मचारीको कमजोरीका आधारमा सम्पूर्ण प्रहरी सङ्गठनकै आलोचना गर्नु उपयुक्त नहुने तर्क गरेका छन्।
युक्रेनी अधिकारीहरूले उक्त घटनालाई आतङ्ककारी आक्रमणका रूपमा अनुसन्धान गरिरहेका छन्, तर हालसम्म आक्रमणको स्पष्ट कारण खुल्न सकेको छैन।
प्रारम्भिक विवरणअनुसार आक्रमणकारीको मानसिक अवस्था अस्थिर देखिएको थियो। हाल ८ जना घाइतेको अस्पतालमा उपचार भइरहेको छ, जसमध्ये एक जनाको अवस्था अत्यन्त नाजुक र तीन जनाको अवस्था गम्भीर छ।
अधिकारीहरूका अनुसार आक्रमणकारीले गोलीकाण्डअघि आफ्नै अपार्टमेन्टमा आगो लगाएका थिए। राष्ट्रपति भोलोदिमिर जेलेन्स्कीले पनि उक्त घटनाबारे प्रतिक्रिया दिँदै ती दुई प्रहरी अधिकारी घटनास्थलमा उपस्थित भए पनि आक्रमणकारीलाई रोक्नुको सट्टा भागेको आरोप लगाएका छन्। उनले उनीहरूविरुद्ध आपराधिक मुद्दा दर्ता गरी अनुसन्धान भइरहेको जानकारी दिएका छन्।
आक्रमणमा मृत्यु हुनेमध्ये एक जना घाइते बालकका बुबा र अर्का एक मृतक ती बालककी फुपू रहेको अनुमान गरिएको छ। प्रहरीका अनुसार ५८ वर्षीय ती आक्रमणकारी रूसको राजधानी मस्कोका बासिन्दा थिए र पछिल्लो समय उनी किभमा बस्दै आएका थिए।
युक्रेनमा कानुनी सर्तहरू पूरा गरेमा गैर-स्वचालित हतियार राख्न अनुमति दिइन्छ। हतियार राख्नका लागि आपराधिक पृष्ठभूमि नभएको र मानसिक रूपमा स्वस्थ हुनुपर्ने कानुनी प्रावधान छ।