इरानसँग सम्झौता चाहन्छन् ट्रम्प !
प्रकाशित मिति : १० चैत्र २०८२, मंगलबार
मध्यपूर्वमा जारी तनाव अन्त्य गर्ने उद्देश्यसहित अमेरिकी राष्ट्रपति डोनाल्ड ट्रम्प इरानसँग सम्झौता गर्ने दिशामा अग्रसर देखिएका छन्। मंगलबार इजरायलका तीन जना वरिष्ठ अधिकारीहरूले यस्तो जानकारी दिएका हुन्।
रोयटर्सका अनुसार नाम सार्वजनिक नगर्ने सर्तमा बोलेका ती अधिकारीहरूका अनुसार, नयाँ चरणको वार्तामा इरानले अमेरिकाका कडा सर्तहरू स्वीकार गर्ने सम्भावना अत्यन्तै कम देखिएको छ। उनीहरूले फेब्रुअरी २८ मा अमेरिका–इजरायलद्वारा इरानमाथि सैन्य आक्रमण सुरु भएसँगै वार्ता विफल भएको बताएका छन्।
अमेरिकाले इरानसँग गर्न खोजेको सम्भावित सम्झौतामा इरानको आणविक कार्यक्रम र ब्यालिस्टिक क्षेप्यास्त्र विकासमा कडाइ गर्ने विषय प्रमुख रूपमा समावेश हुने अनुमान गरिएको छ। यी विषयहरू लामो समयदेखि अन्तर्राष्ट्रिय विवादको केन्द्रमा रहँदै आएका छन्।
सोमबार राष्ट्रपति डोनाल्ड ट्रम्पले सामाजिक सञ्जालमार्फत अमेरिका र इरानबीच “मध्यपूर्वमा शत्रुताको पूर्ण समाधान” का लागि “धेरै राम्रो र उपलब्धिमूलक” संवाद भएको दाबी गरेका थिए। तर, ट्रम्पको उक्त भनाइलाई इरानले तुरुन्तै खण्डन गर्दै कुनै पनि औपचारिक वार्ता नभएको स्पष्ट पारेको छ।
यता, इजरायली प्रधानमन्त्री बेन्जामिन नेतन्याहूले पनि ट्रम्पको धारणा सार्वजनिक गर्दै, अमेरिका र इजरायलका सेनाले हासिल गरेका सैन्य उपलब्धिहरूलाई उपयोग गर्दै युद्धका लक्ष्यहरू कूटनीतिक सम्झौतामार्फत प्राप्त गर्न सकिने सम्भावना रहेको बताएका छन्। उनले यस्तो सम्भावित सम्झौताले इजरायलका महत्वपूर्ण राष्ट्रिय हितहरू सुरक्षित राख्ने विश्वास व्यक्त गरेका छन्।
तर, इजरायलभित्रै पनि यस्तो सम्झौताप्रति शंका कायम रहेको स्रोतहरूले बताएका छन्। विशेषगरी, इरानले आफ्नो रणनीतिक कार्यक्रमहरूमा सम्झौता गर्न इच्छुक नदेखिएको इजरायली पक्षले मूल्याङ्कन गरेको छ।