अमेरिकाद्वारा विदेशमा निर्मित इन्टरनेट राउटरमाथि प्रतिबन्ध
प्रकाशित मिति : ९ चैत्र २०८२, सोमबार
अमेरिकाले विदेशमा निर्मित नयाँ ‘कन्जुमर’ (उपभोक्ता) इन्टरनेट राउटरहरूमा प्रतिबन्ध लगाएको छ। राष्ट्रिय सुरक्षासम्बन्धी चिन्ताका कारण यो कदम चाल्नु परेको अधिकारीहरूले बताएका छन्।
संघीय सञ्चार आयोग ले अद्यावधिक गरेको असुरक्षित उपकरणहरूको सूचीमा अमेरिका बाहिर निर्मित सबै उपभोक्ता स्तरका राउटरहरूलाई समावेश गरेको छ।
राउटरहरू घर तथा व्यवसायमा कम्प्युटर, मोबाइल फोन, टेलिभिजन र अन्य उपकरणलाई इन्टरनेटसँग जोड्न प्रयोग गरिन्छन्। यसअघि, गत वर्षको अन्त्यतिर विदेशमा बनेका ड्रोनहरूमाथि पनि प्रतिबन्ध लगाइएको थियो।
विदेशमा निर्मित राउटरहरूमा रहेका सुरक्षागत कमजोरीहरूको दुरुपयोग गर्दै अमेरिकी घरपरिवारमाथि आक्रमण, सञ्जाल अवरोध, जासुसी गतिविधि तथा बौद्धिक सम्पत्ति चोरी हुन सक्ने अधिकारीहरूको निष्कर्ष छ। यद्यपि, पहिलेदेखि नै प्रयोगमा रहेका विदेशी राउटरहरू भने चलाउन पाइनेछ; यो प्रतिबन्ध नयाँ उपकरण र मोडेलहरूमा मात्र लागू हुनेछ।
पछिल्लो एक वर्षदेखि राउटरहरू ह्याकर र साइबर समूहका लागि सजिलो ‘प्रवेश बिन्दु’ बन्न सक्ने चिन्ताका बीच यो निर्णय गरिएको हो। विशेष गरी चीनमा निर्मित एक लोकप्रिय राउटर ब्रान्ड अनलाइन बजारमा अत्यधिक बिक्री हुनेमध्ये पर्छ, जुन गत वर्षका केही साइबर आक्रमणपछि अमेरिकी राजनीतिक वृत्तमा चिन्ताको विषय बनेको थियो।
अब अमेरिका बाहिर बनेका कुनै पनि नयाँ राउटरहरू देशभित्र आयात, प्रचार वा बिक्री गर्नुअघि संघीय सञ्चार आयोगको अनिवार्य स्वीकृति लिनुपर्नेछ। यो स्वीकृति पाउनका लागि विदेशी कम्पनीहरूले आफ्ना लगानीकर्ता तथा प्रभावबारे जानकारी दिनुका साथै उत्पादन प्रक्रिया अमेरिकाभित्रै ल्याउने योजना प्रस्तुत गर्नुपर्नेछ।
रक्षा मन्त्रालय वा गृह मन्त्रालयले सुरक्षित ठानेका केही विशेष राउटरहरूलाई भने प्रतिबन्धबाट छुट दिन सकिने आयोगले जनाएको छ। तर, हालसम्म कुनै पनि उपकरणलाई यस्तो छुट दिइएको छैन।
राष्ट्रिय सुरक्षामा कार्यरत सरकारी निकायहरूको प्रतिवेदनका आधारमा यो निर्णय लिइएको हो। आयोगका अनुसार सन् २०२४ देखि २०२५ को बीचमा अमेरिकाको पूर्वाधारलाई लक्षित गरी भएका तीनवटा ठुला साइबर आक्रमणहरूमा राउटरमार्फत नै अनधिकृत पहुँच बनाइएको थियो।
अमेरिकामा लोकप्रिय प्रायः सबै राउटर ब्रान्डहरू विदेशमै उत्पादन गरिन्छन्। नयाँ प्रकारको ‘स्टारलिङ्क’ वाइफाइ राउटर भने अमेरिकाभित्रै उत्पादन हुने केही अपवादमध्ये एक हो। कम्पनीका अनुसार यी राउटरहरू टेक्सासमा निर्माण गरिन्छन्।