एप्स्टिन प्रकरण: पूर्व राष्ट्रपति बिल क्लिन्टनको बयान, “तस्बिरमा देखिएकी महिलासँग कुनै सम्बन्ध छैन”
प्रकाशित मिति : १५ फाल्गुन २०८२, शुक्रबार
अमेरिकी पूर्व राष्ट्रपति बिल क्लिन्टनले जेफ्री एप्स्टिनसँग आफ्नो सम्बन्ध केवल “छोटो चिनजान” मात्र रहेको बताएका छन्।
उनले एप्स्टिनका अपराधहरूबारे आफूलाई कुनै जानकारी नभएको दाबी गरे। एप्स्टिन अदालतबाट दोषी प्रमाणित यौन अपराधी हुन्, जसको हिरासतमा मृत्यु भइसकेको छ।
कंग्रेसको निगरानी समितिसमक्ष करिब छ घण्टाभन्दा बढी समय भएको सोधपुछका क्रममा सांसदहरूले क्लिन्टन र एप्स्टिनबीचको सम्बन्ध स्पष्ट पार्ने प्रयास गरेका थिए।
सो क्रममा न्याय मन्त्रालयले हालै सार्वजनिक गरेका सामग्रीहरूका आधारमा क्लिन्टनका विभिन्न तस्बिरहरू देखाउँदै “महिलाहरूसँग यौन सम्बन्ध राखेको हो कि होइन?” भनी प्रश्न गरिएको थियो। स्रोतहरूका अनुसार, क्लिन्टनले हरेक पटक त्यस्ता आरोपहरू अस्वीकार गरेका थिए।
एउटा चर्चित तस्बिरमा क्लिन्टन एक महिलासँग ‘हट टब’ (तातोपानी पोखरी) मा देखिएका छन्, जसमा महिलाको अनुहार स्पष्ट छैन। क्लिन्टनले ती महिलालाई आफूले नचिनेको र उनीसँग कुनै सम्बन्ध नरहेको स्पष्ट पारेका छन्। दुवै दलका सांसदहरूका अनुसार क्लिन्टनले सोधिएका सबै प्रश्नको जवाफ दिएका छन् र कुनै पनि गलत काम नगरेको दाबी गरेका छन्।
क्लिन्टनले आफ्नो प्रारम्भिक वक्तव्यमा भने, “एप्स्टिनले के गरिरहेका थिए भन्नेबारे मलाई कुनै जानकारी थिएन। मैले जे देखेँ, त्यति मात्र जान्दछु। अझ महत्त्वपूर्ण कुरा, मैले केही पनि गलत देखिनँ र कुनै गलत कार्य गरिनँ।” यद्यपि, यौन गतिविधिसम्बन्धी प्रश्नहरूले एप्स्टिनसँगको विगतको सम्बन्धले क्लिन्टन र उनको परिवारलाई अझै पनि पछ्याइरहेको संकेत गरेको छ।
यो बयान रिपब्लिकन नेतृत्वको समितिले सञ्चालन गरेको एप्स्टिनसम्बन्धी छानबिनको एक उच्च-स्तरीय चरणको अन्त्य थियो। यसअघि उनकी पत्नी हिलारी क्लिन्टनले पनि शपथसहित बयान दिइसकेकी छन्। क्लिन्टनको बयान वासिङ्टनमा नभई न्युयोर्क राज्यको चापाक्वामा बन्द कोठाभित्र लिइएको थियो।
उनी कंग्रेसको समितिसमक्ष बाध्यकारी आदेश अन्तर्गत बयान दिने पहिलो पूर्व राष्ट्रपति बनेका छन्, जसलाई भविष्यका अन्य राष्ट्रपतिहरूका लागि पनि एउटा नयाँ नजिरका रूपमा विश्लेषण गरिएको छ।
क्लिन्टन दम्पतीका वकिल र समितिबीच महिनौँदेखि बयानका सर्तहरूबारे छलफल चलेको थियो। सुरुमा उपस्थित हुन अस्वीकार गरे पनि कंग्रेसको अवहेलनासम्बन्धी कारबाही प्रक्रिया अघि बढेपछि मात्र उनीहरू बयान दिन सहमत भएका थिए।
समितिका एक डेमोक्र्याट सदस्यले क्लिन्टन अत्यन्त सहयोगी रहेको र उनले कुनै पनि प्रश्नमा ‘मौन बस्ने अधिकार’ प्रयोग नगरेको बताएका छन्।
सोही क्रममा क्लिन्टनले सन् २००० को दशकको सुरुवाततिर एक गल्फ प्रतियोगितामा डोनाल्ड ट्रम्पले आफूलाई “एप्स्टिनसँग जग्गा कारोबारको विषयमा मतभेद भएको” बताएको कुरा पनि समितिलाई सुनाएका थिए।
क्लिन्टनले सन् २००१ देखि २००४ को बीचमा आफ्ना सहयोगीहरूसहित एप्स्टिनको निजी विमानमा गरेको यात्राका सम्बन्धमा पनि स्पष्टीकरण दिएका छन्।
उनले यदि एप्स्टिनका गतिविधिबारे कुनै शंका भएको भए आफू विमानमा नचढ्ने मात्र नभई आफैँले कानुनी कारबाहीको माग गर्ने समेत बताएका छन्।