अमेरिकामा सांसदहरूले बिनाअनुमति आप्रवासन थुनुवा केन्द्रको निरीक्षण गर्न नपाउने
प्रकाशित मिति : पुस २५, २०८२ शनिबार
डिएचएस फोटो: सिड्नी फिनिक्स
अमेरिकामा ‘आइस’ एजेन्टद्वारा रेनी गुडको हत्या भएपछि आप्रवासन थुनुवा केन्द्रहरूमा कंग्रेस सदस्यहरूको अनुगमनमा नयाँ प्रतिबन्ध लगाइएको छ।
मिनियापोलिसमा अमेरिकी आप्रवासन तथा भन्सार प्रवर्तन (आइस) का एक एजेन्टले रेनी गुडको गोली हानी हत्या गरेको केही दिनपछि, गृहमन्त्री क्रिस्टी नोएमले कंग्रेस सदस्यहरूको निरीक्षण भ्रमणमा नयाँ प्रतिबन्ध लगाउने आदेश गोप्य रूपमा जारी गरेकी छन्। ट्रम्प प्रशासनले उक्त आदेश शनिबार ढिलो गरी अदालतमा सार्वजनिक गरेको हो।
नयाँ आदेशअनुसार अब सांसदहरूले ‘आइस’ केन्द्रहरूको निरीक्षण भ्रमण गर्न कम्तीमा सात दिन अगाडि नै सूचना दिनुपर्नेछ। यही नीतिका कारण शनिबार मिनेसोटाका तीन जना डेमोक्र्याट सांसदलाई मिनियापोलिसस्थित ह्विपल संघीय भवनमा रहेको थुनुवा केन्द्रमा प्रवेश नदिइएको स्पष्ट भएको छ।
मिनेसोटाबाट प्रतिनिधित्व गर्ने कंग्रेस सदस्यहरू इल्हान ओमार, एन्जी क्रेग र केली मोरिसनले बुधबारको गोलीकाण्डपछि उत्पन्न तनावपूर्ण अवस्थाबीच थुनुवाहरूको अवस्था बुझ्न आफूहरू निरीक्षणमा गएको तर रोकिएको बताएका छन्।
“आइस केन्द्रहरूमा के भइरहेको छ भन्ने कुरा जनताले जान्न पाउनुपर्छ,” ओमारले सामाजिक सञ्जाल ‘एक्स’ मा लेख्दै आफूलाई केन्द्रमा प्रवेश नदिइएको पुष्टि गरिन्।
गत महिना एक संघीय न्यायाधीशले झन्डै यस्तै प्रकृतिको नीति खारेज गरेका थिए। वासिङ्टन डीसीस्थित अमेरिकी जिल्ला न्यायाधीश जिया कोबले संघीय खर्चसम्बन्धी कानुनअनुसार कंग्रेस सदस्यहरूलाई बिनाअग्रिम सूचना ‘आइस’ थुनुवा केन्द्र निरीक्षण गर्न रोक लगाउन नपाइने बताएका थिए। यस्तो निरीक्षण कंग्रेसको संवैधानिक दायित्वको महत्त्वपूर्ण हिस्सा भएको अदालतको ठहर थियो।
तर, मन्त्री नोएमले आफ्नो नयाँ आदेशमा न्यायाधीश कोबको निर्णयसँग असहमति जनाएकी छन्। उनले वार्षिक खर्च विधेयकबाट नभई छुट्टै कानुन ‘वन बिग ब्युटिफुल बिल एक्ट’ अन्तर्गतको बजेट प्रयोग गरेर कंग्रेस भ्रमण व्यवस्थापन गरिने बताएकी छन्। यस कदममार्फत वार्षिक खर्च कानुनमा रहेका प्रतिबन्धहरूलाई छल्न खोजिएको आरोप लागेको छ।
तीनै जना सांसदहरूलाई नयाँ नीतिबारे कुनै जानकारी नदिइएको अवस्थामा उनीहरू ह्विपल भवन पुगेका थिए। मोरिसनका अनुसार सुरुमा स्थानीय अधिकारीहरूले उनीहरूलाई प्रवेश दिएका थिए, तर पछि “अचानक बाहिर जान भनियो।”