मिनियापोलिस गोलीकाण्डपछि बढ्यो तनाव, आप्रवासन कार्यान्वयनविरुद्ध अमेरिकाभर प्रदर्शनको तयारी
प्रकाशित मिति : पुस २५, २०८२ शनिबार
आइस अधिकारीले एक महिलालाई गोली हानी हत्या गरेपछि त्यसको विरोधमा बिहीबार लस एन्जलसमा भएको प्रदर्शन । तस्वीर : जे सी. हङ/एपी-रासस
अमेरिकामा आप्रवासन कार्यान्वयनविरुद्ध शनिबार देशभरका सहरहरूमा व्यापक प्रदर्शनहरू आयोजना हुने भएका छन्। मिनियापोलिसमा एक आइस अधिकारीले एक महिलालाई गोली हानी हत्या गरेको र ओरेगनको पोर्टल्यान्डमा अर्को घटनामा दुई जनालाई गोली लागेर घाइते बनाइएको घटनापछि विरोध प्रदर्शनको तयारी तीव्र बनेको हो।
अमेरिकी डिपार्टमेन्ट अफ होमल्यान्ड सेक्युरिटीले मिनेसोटाको ‘ट्विन सिटिज’ क्षेत्रमा आफूले अहिलेसम्मकै सबैभन्दा ठूलो आप्रवासन कार्यान्वयन अभियान सञ्चालन गरिरहेको जनाएको छ। राष्ट्रपति डोनाल्ड ट्रम्पको प्रशासनले दुवै गोलीकाण्ड आत्मरक्षाका क्रममा भएको दाबी गर्दै चालकहरूले आफ्ना सवारीसाधनलाई हतियारका रूपमा प्रयोग गरी संघीय अधिकारीमाथि आक्रमण गर्न खोजेको आरोप लगाएको छ।
ट्रम्प प्रशासनको विरोधमा गठन भएको सामाजिक आन्दोलन संस्था ‘इन्डिभिजिबल’ ले टेक्सास, क्यान्सास, न्यु मेक्सिको, ओहायो, फ्लोरिडा लगायत अन्य धेरै राज्यहरूमा सयौँ प्रदर्शनहरू तय भएको जानकारी दिएको छ। धेरै प्रदर्शनहरूलाई ‘इमिग्रेसन एन्ड कस्टम्स इन्फोर्समेन्ट’ (आइस)को संक्षेप प्रयोग गर्दै “आइस आउट फर गुड” नाम दिइएको छ। इन्डिभिजिबल र यसका स्थानीय शाखाहरूले गत वर्ष अमेरिकाका सबै ५० राज्यमा यस्तै प्रदर्शनहरू आयोजना गरेका थिए।
शनिबार बिहान फिलाडेल्फियामा पनि इन्डिभिजिबलको नेतृत्वमा प्रदर्शन सुरु भइसकेको सीबीएस फिलाडेल्फियाले जनाएको छ। प्रदर्शनकारीहरू सहरको संघीय थुनुवा केन्द्रतर्फ मार्च गर्दै त्यहाँ भइरहेको अर्को र्यालीमा सहभागी हुने तयारीमा छन्।
मिनियापोलिसमा आप्रवासी अधिकार समूहहरूको गठबन्धनले पाउडरहर्न पार्कमा ठूलो प्रदर्शनको आह्वान गरेको छ। यो पार्क बुधबार आवासीय क्षेत्रमा ३७ वर्षीया रेनी गुडलाई गोली लागेको स्थानबाट करिब आधा माइल टाढा रहेको ठूलो हरित क्षेत्र हो। आयोजकहरूले र्याली र मार्चले गुडको जीवनको सम्मान गर्ने तथा “हाम्रा सडकमा भइरहेको घातक आतंकको अन्त्य” को माग उठाउने बताएका छन्।
हालसम्म सो आवासीय क्षेत्रमा भएका प्रदर्शनहरू शान्तिपूर्ण रहेको जनाइएको छ। यो अवस्था सन् २०२० मा जर्ज फ्लोयडको हत्या पछि मिनियापोलिसमा फैलिएको व्यापक हिंसासँग विपरीत मानिएको छ। तर, विमानस्थल नजिक भने बिहीबार र शुक्रबार साना समूहका प्रदर्शनकारी र ट्विन सिटिज अभियानको आधारका रूपमा प्रयोग भइरहेको संघीय भवनको सुरक्षा गरिरहेका संघीय एजेन्टहरूबीच केही झडप भएको बताइएको छ।
मिनियापोलिस प्रहरीले शुक्रबार राति भएको प्रदर्शनका क्रममा पक्राउ परेका ३० जनालाई रिहा गरिएको जानकारी दिएको छ। प्रहरीका अनुसार प्रदर्शनकारीहरूले प्रहरी अधिकारी, प्रहरी सवारीसाधन तथा अन्य गाडीहरूतर्फ बरफ, हिउँ र ढुंगा फ्याँकेका थिए। यद्यपि ती घटनामा कुनै गम्भीर चोटपटक नलागेको प्रहरीले जनाएको छ।
ट्रम्प प्रशासनले सोमाली समुदायका केही बासिन्दासँग सम्बन्धित ठगीका आरोपसँग आंशिक रूपमा जोडिएको व्यापक कडाइअन्तर्गत मिनेसोटामा हजारौँ संघीय अधिकारी खटाएको छ। यस अभियानमा २,००० भन्दा बढी संघीय अधिकारी सहभागी रहेको बताइएको छ।
यसैबीच, कतिपय संघीय अधिकारीहरूलाई गत महिनादेखि सुरु भएको र फेब्रुअरीसम्म चल्ने अपेक्षा गरिएको लुइजियानाको अर्को आप्रवासन अभियानबाट अचानक फिर्ता बोलाएर मिनेसोटा पठाइएको खुलासा भएको छ।