अमेरिकामा गोलीकाण्ड: बन्दुकधारी मारिए, तीन जना घाइते
प्रकाशित मिति : पुस ११, २०८२ शनिबार
अमेरिकाको आइडाहो राज्यमा भएको गोलीकाण्डमा एकजना बन्दुकधारी मारिएका छन् ।अन्य तीन जना घाइते भएका छन्। वालस सहरस्थित शोशोन काउन्टी शेरिफ कार्यालयको लबी र बाहिरको सडकमा एक व्यक्तिले अन्धाधुन्ध गोली चलाउँदा उक्त हताहती भएको हो।
घटनालगत्तै सुरक्षाकर्मीले गरेको जवाफी कारवाहीमा संदिग्ध आक्रमणकारी मारिएको स्थानीय शेरिफले जानकारी दिएका छन्। शोशोन काउन्टीका शेरिफ विलियम एडीका अनुसार ती व्यक्तिले सुरुमा शेरिफ कार्यालय बाहिर रहेको पिकअप ट्रकतर्फ गोली प्रहार गरेका थिए। त्यसपछि कार्यालयको लबीभित्र प्रवेश गरी ‘डिस्प्याच केन्द्र’ तर्फ गोली चलाएका थिए।
पिकअप ट्रकमा रहेका दुई महिलाको खुट्टामा गोली लागेको छ भने एक जना डेपुटी (प्रहरी अधिकारी) को कानमा चोट लागेको छ। घाइते सबैको अवस्था सामान्य रहेको बताइएको छ। घटनापछि स्वाट टोलीसहित ठूलो संख्यामा सुरक्षाकर्मी परिचालन गरिएको थियो। आक्रमणकारीको पहिचान र उद्देश्य भने अझै खुल्न सकेको छैन।
कुटेनाइ काउन्टीका शेरिफ रोबर्ट नोरिसले शेरिफ कार्यालयकै लबीमा प्रवेश गरेर गोली प्रहार हुनुलाई गम्भीर घटनाका रूपमा लिएका छन्। शेरिफ एडीका अनुसार आक्रमणकारीले जेलभित्र रहेका व्यक्तिहरूलाई लक्षित गर्न खोजेको हुनसक्ने अनुमान गरिएको छ, यद्यपि जेलभित्र रहेका सबै सुरक्षित छन्।
यस घटनाको आपराधिक अनुसन्धान कुटेनाइ काउन्टी शेरिफ कार्यालय र कोर ड’अलेन प्रहरी विभागले गर्नेछन्। अधिकारी संलग्न गोलीकाण्डको छुट्टै अनुसन्धान आइडाहो स्टेट प्रहरीले गर्ने तय भएको छ। वालस सहर वासिङ्टन राज्यको स्पोकेनबाट करिब ७० माइल पूर्वमा पर्दछ।
काउन्टी शेरिफ कार्यालय काउन्टीस्तरको प्रमुख कानून कार्यान्वयन संस्था हो । जसले नागरिकको सुरक्षा, अपराध नियन्त्रण र न्याय प्रणालीलाई सहयोग गर्ने महत्वपूर्ण भूमिका खेल्छ ।
यद्यपि आइडाहोमा ठूला सामूहिक गोलीकाण्डहरू कम हुने गरेका छन्, तर घरेलु विवाद, अतिवादी गतिविधि र सुरक्षाकर्मी (अफिसर) सँग सम्बन्धित घटनाहरू समय-समयमा देखिने गर्दछन्। त्यसैले, पछिल्ला वर्षहरूमा सुरक्षा सतर्कता र आपतकालीन प्रतिक्रिया प्रणालीलाई थप सुदृढ बनाउने प्रयासहरू भइरहेका छन्।
आइडाहो अमेरिकाको उत्तरपश्चिमी भागमा पर्ने एउटा राज्य हो। यो राज्य प्राकृतिक सौन्दर्य, पहाड, नदी, जङ्गल र कृषिका लागि प्रसिद्ध छ। अन्य ठूला राज्यहरूको तुलनामा यहाँको जनसङ्ख्या कम छ। यहाँ धेरै साना सहर र ग्रामीण क्षेत्रहरू छन्। यहाँको जीवनशैली सामान्यतया शान्त, प्रकृतिसँग नजिक र समुदाय-केन्द्रित मानिन्छ।