रुसी सेनाका तालिम विभाग प्रमुखको कार बम विस्फोटमा मृत्यु, युक्रेनमाथि आशंका
प्रकाशित मिति : पुस ६, २०८२ सोमबार
फोटोः एपी/रासस
रुसको राजधानी मस्कोमा भएको कार बम विस्फोटमा एक उच्चपदस्थ रुसी जर्नेलको मृत्यु भएको छ। रुसी अधिकारीहरूले यस घटनामा युक्रेनको संलग्नता रहेको आरोप लगाएका छन्।
रुसी अनुसन्धान समितिका अनुसार, सशस्त्र बलको सञ्चालनात्मक तालिम विभागका प्रमुख लेफ्टिनेन्ट जर्नेल फानिल सरवारोभको आफ्नो कारमुनि जडान गरिएको विस्फोटक पदार्थ विष्फोट हुँदा मृत्यु भएको हो। अनुसन्धानकर्ताहरूले यसलाई ‘लक्षित हत्या’ को रूपमा अनुसन्धान गरिरहेका छन्। उनीहरूले यसमा युक्रेनी विशेष सुरक्षा दस्ताको भूमिका हुनसक्ने दाबी गरेका छन्।
५६ वर्षीय सरवारोभले नौ वर्षसम्म तालिम विभागको नेतृत्व गरेका थिए। यसअघि उनले सिरियामा राष्ट्रपति बशर अल असदको समर्थनमा सञ्चालित सैन्य अभियानको व्यवस्थापन र सञ्चालनमा महत्त्वपूर्ण भूमिका खेलेका थिए। राष्ट्रपति भ्लादिमिर पुटिनलाई सरवारोभको मृत्युबारे तत्काल जानकारी गराइएको थियो।
सन् २०२२ मा युक्रेनमाथि रुसले पूर्णस्तरको आक्रमण सुरु गरेयता मस्कोमा विस्फोटक आक्रमण वा गोली प्रहारबाट धेरै चर्चित रुसी व्यक्तित्वहरूको ज्यान गइसकेको छ। यी घटनाहरूको दोष रुसले युक्रेनी सुरक्षा सेवामाथि लगाउँदै आएको छ।
रुसी सरकारी सञ्चारमाध्यमले सार्वजनिक गरेको भिडियोमा मस्कोको एक मध्यमवर्गीय आवासीय क्षेत्रको पार्किङ स्थलमा गम्भीर रूपमा क्षतिग्रस्त गाडी देखिएको छ।
मस्कोमा मारिने अन्य वरिष्ठ रुसी अधिकारीहरूमध्ये लेफ्टिनेन्ट जर्नेल यारोस्लाभ मोस्कालिक पनि हुन्, जो गत अप्रिलमा मस्को नजिकै भएको कार बम आक्रमणमा मारिएका थिए। त्यस्तै, एक वर्षअघि रुसी सेनाको आणविक र रासायनिक सुरक्षा बलका प्रमुख इगोर किरीलोभ आवासीय भवनको प्रवेशद्वार नजिकै स्कुटरमा जडान गरिएको विस्फोटक पदार्थ पड्किँदा मारिएका थिए। उक्त घटनाको जिम्मेवारी युक्रेनले तत्कालै स्वीकार गरेको थियो।
यसै वर्ष फेब्रुअरीमा, युक्रेनले “आपराधिक योजनाकार” भनेर चिनिएका प्रो-रुसी मिलिसिया समूहका संस्थापक आर्मेन सार्किस्यान पनि मस्कोको केन्द्रमा भएको बम विस्फोटमा मारिएका थिए। यसअघि २०२२ मा रुसी राष्ट्रवादी आन्दोलनकी प्रमुख हस्ती दार्या दुगिना र २०२३ अप्रिलमा सेन्ट पिटर्सबर्गको एक क्याफेमा भएको बम विस्फोटमा प्रभावशाली युद्ध-ब्लगर भ्लादलेन तातार्स्कीको ज्यान गएको थियो।