बाइडेनले अमेरिकालाई विश्वकै खराब अर्थतन्त्र सुम्पेको भान्सको आरोप
प्रकाशित मिति : पुस १, २०८२ बुधबार
अमेरिकी उपराष्ट्रपति जेडी भान्सले पूर्व राष्ट्रपति जो बाइडेनले अमेरिकालाई विश्वकै खराब अर्थतन्त्र सुम्पेको आरोप लगाएका छन्। पेन्सिल्भेनिया भ्रमणका क्रममा उनले अमेरिकामा व्याप्त महँगीको दोष पूर्व राष्ट्रपति बाइडेनमाथि थोपरेका हुन्।
भान्सले सार्वजनिक पछिल्लो निराशाजनक रोजगारी प्रतिवेदनलाई खारेज गर्दै ट्रम्प प्रशासनको आर्थिक योजनाको बचाउ गरे। उनले जीवनयापन खर्चको संकट समाधान गर्न डोनाल्ड ट्रम्पभन्दा बढी आतुर व्यक्ति कोही नभएको दाबी समेत गरे।
ट्रम्प प्रशासनको करिब एक वर्ष पूरा हुन लाग्दा निर्णायक ‘स्विङ स्टेट’ मानिने पेन्सिल्भेनियामा भान्सले समर्थकहरूलाई सम्बोधन गर्ने र आफ्ना योजना बुझाउने अवसर पाएका छन्।
मध्यावधि निर्वाचन आउन अब एक वर्षभन्दा कम समय बाँकी रहँदा भएको भान्सको यो भ्रमणलाई निकै अर्थपूर्ण रूपमा हेरिएको छ। यो निर्वाचनमा अमेरिकी कंग्रेसका दुवै सदनमा नियन्त्रण गुमाउन सक्ने जोखिममा रिपब्लिकनहरू रहेका छन्।
हालैका जनमत सर्वेक्षणहरूले राष्ट्रपति ट्रम्पको अर्थतन्त्रसम्बन्धी नेतृत्वप्रति मतदाताहरू असन्तुष्ट हुँदै गएको देखाएका छन्।
सर्वेक्षणअनुसार, १० मध्ये ७ जना अमेरिकी वयस्कले देशको अर्थतन्त्रलाई “खराब” भनेका छन्। केवल ३१ प्रतिशतले मात्र ट्रम्पको आर्थिक व्यवस्थापनलाई अनुमोदन गरेका छन्, जुन ट्रम्प प्रशासनका लागि अहिलेसम्मकै न्यून स्तर हो।
गत साता पेन्सिल्भेनियाको माउन्ट पोकोनोमा भएको ट्रम्पको आफ्नै र्यालीलाई पनि जीवनयापन खर्चबारे मतदाताको चिन्ता सम्बोधन गर्ने अवसरका रूपमा हेरिएको थियो। ट्रम्पले कमजोर जनमत सर्वेक्षणलाई बेवास्ता गर्दै महँगी र जीवनयापनको संकट डेमोक्र्याटहरूका कारण उब्जिएको दाबी गर्दै आएका छन्।
भान्सले ट्रम्पद्वारा हस्ताक्षरित कर छुटसम्बन्धी कानुनको प्रशंसा गरे। साथै, अवैध आप्रवासनविरुद्धको कडाइले सार्वजनिक सेवा र आवास बजारमाथिको दबाब घटाउने दाबी समेत उनले गरे।
रिपब्लिकनहरूले प्रतिनिधिसभा र सिनेट दुवैमा आफ्नो नियन्त्रण कायम राख्न चाहेकाले आगामी महिनाहरूमा भान्सले वाशिङ्टन बाहिर चुनावी प्रचारमा बढी समय बिताउने अपेक्षा गरिएको छ।
समर्थकहरूका अनुसार पेन्सिल्भेनिया जस्ता ‘स्विङ स्टेट’ मा प्रचार गर्नु भान्सका लागि भविष्यमा आफ्नै राष्ट्रपतीय उम्मेदवारीको आधार तयार गर्ने अवसर पनि हुन सक्छ।
उनले सन् २०२८ को राष्ट्रपतीय चुनावमा उम्मेदवारी दिने ढोका खुला राखे पनि तत्कालका लागि भने आफू “मध्यावधि चुनावमै केन्द्रित” रहेको बताएका छन्।