आक्रमणकारीको बन्दुक खोस्ने अहमदलाई भेटेर प्रधानमन्त्रीले भने – ‘अष्ट्रेलियाली नायक’
प्रकाशित मिति : मंसिर ३०, २०८२ मंगलबार
अष्ट्रेलियामा सन् १९९६ यता भएको सबैभन्दा घातक बन्दुक आक्रमणमा एक बन्दुकधारीलाई निशस्त्र पार्ने प्रयास गरेका अहमद अल अहमदलाई अष्ट्रेलियाका प्रधानमन्त्री एन्थोनी अल्बानिजले अस्पतालमै भेट गरेका छन्। आक्रमणका क्रममा एक जना बन्दुकधारीलाई निशस्त्र पार्न खोज्दा गम्भीर घाइते भएका अहमदलाई प्रधानमन्त्रीले “हाम्रो देशको उत्कृष्ट प्रतिनिधि” भन्दै सम्मान व्यक्त गरे।
दुई सन्तानका पिता तथा फलफूल पसलका मालिक अहमद सिरियामा जन्मिएर हुर्किएका हुन्। प्रत्यक्षदर्शीका अनुसार, कफी किन्न निस्किएका बेला उनले आफ्नै अगाडि मानिसहरूलाई गोली हानिँदै गरेको देखेपछि जोखिम मोलेर हस्तक्षेप गरेका थिए। सो क्रममा उनको काँधमा गोली लागेको थियो। प्रधानमन्त्री अल्बानिजका अनुसार अहमदले बुधबार थप शल्यक्रिया गराउने छन्।
आइतबार सिड्नीमा हनुक्काको पहिलो रात मनाउने कार्यक्रमका क्रममा भएको आक्रमणमा कम्तीमा १५ जनाको मृत्यु भएको पुष्टि भएको छ। प्रहरीले उक्त घटनालाई यहूदी समुदायलाई लक्षित गरिएको आतङ्कवादी आक्रमण घोषणा गरेको छ।
प्रधानमन्त्री अल्बानिजले अस्पतालबाटै भने, “उहाँको बहादुरी सबै अष्ट्रेलियालीहरूका लागि प्रेरणादायी छ। दुष्टता देखिएको यस्तो क्षणमा उहाँ मानवताको शक्तिको उज्यालो उदाहरण बन्नुभएको छ।” उनले थपे, “अहमद, तपाईं अष्ट्रेलियाका नायक हुनुहुन्छ।”
घटनाको भिडियो फुटेजमा अहमद पार्क गरिएको कारको पछाडि लुकेर बसेपछि अचानक बाहिर निस्कँदै आरोपित बन्दुकधारीतर्फ दौडिएको देखिन्छ। उनले बन्दुक खोसेर आक्रमणकारीलाई पछि हट्न बाध्य पारेका छन्। त्यसपछि उनले हतियार तल राखी एक हात उठाएर आफू आक्रमणकारी नभएको संकेत प्रहरीलाई दिएका थिए।
अहमदप्रति देशभरबाट समर्थन बढेको छ। अमेरिकी राष्ट्रपति डोनाल्ड ट्रम्पले पनि उनको साहसको प्रशंसा गरेका छन्। साथै, एक अमेरिकी अर्बपतिले उनलाई ९९,९९९ डलर दान गर्दै “बहादुर नायक” भनेर सम्मान व्यक्त गरेका छन्।