इसाईहरूको हत्या तत्काल नरोके नाइजेरियाविरुद्ध सैन्य कारबाही गर्ने ट्रम्पको चेतावनी
प्रकाशित मिति : कार्तिक १५, २०८२ शनिबार
अमेरिकी राष्ट्रपति डोनाल्ड ट्रम्पले अफ्रिकी देश नाइजेरियामा इसाईहरूको हत्या तत्काल रोक्न चेतावनी दिएका छन्।
यदि यो हत्या रोक्न नाइजेरिया असफल भएमा अमेरिकी युद्ध मन्त्रालयलाई “छिटो” सैन्य कारबाहीका लागि तयारी गर्न उनले आदेश दिएको बताएका छन्।
ट्रम्पले सामाजिक सञ्जालमा लेख्दै अमेरिकाले तत्कालै नाइजेरियालाई दिँदै आएको सबै सहायता र सहयोग रोक्ने बताए। नाइजेरिया अफ्रिकाको सबैभन्दा धेरै जनसंख्या भएको र तेल उत्पादनमा अगुवा देश हो।
उनले भनेका छन्, अमेरिकाले सेना पठायो भने सीधै आक्रमण गर्दै जानेछन्, जसले यी भयानक अपराध गर्ने इस्लामिक आतङ्ककारीहरूलाई पूर्ण रूपमा नष्ट गर्नेछ। ट्रम्पले यसबारे कुनै प्रमाण वा विशिष्ट विवरण भने दिएका छैनन्।
ट्रम्पले नाइजेरियाको आलोचना गर्दै सरकारलाई छिटो कारबाही गर्न चेतावनी दिएका छन्।
अबुजास्थित नाइजेरिया सरकारको तर्फबाट ट्रम्पको चेतावनीप्रति तत्काल कुनै प्रतिक्रिया आएको छैन। व्हाइट हाउसले पनि सम्भावित अमेरिकी सैन्य कारबाहीबारे टिप्पणी गरेको छैन।
युद्ध मन्त्रालयका प्रवक्ताले भने प्रतिक्रियाका लागि व्हाइट हाउसतर्फ सङ्केत गरेका थिए। तर अमेरिकी युद्ध मन्त्री पीट हेगसेथले सामाजिक सञ्जाल एक्समा “युद्ध मन्त्रालय कारबाहीको तयारीमा छ। नाइजेरिया सरकारले इसाईहरूको रक्षा गर्नुपर्छ, नभए हामी ती आतङ्ककारीहरूलाई समाप्त गर्नेछौँ” भनेर लेखेका छन्।
ट्रम्पको यो बयान उनको प्रशासनले नाइजेरियालाई फेरि “धार्मिक स्वतन्त्रताको गम्भीर उल्लङ्घन गर्ने देश” सूचीमा समावेश गरेको एक दिनपछि आएको हो। सो सूचीमा चीन, म्यानमार, उत्तर कोरिया, रूस र पाकिस्तान पनि छन्।
नाइजेरियाको परराष्ट्र मन्त्रालयले हिंसात्मक उग्रवादविरुद्ध सङ्घर्ष जारी राख्ने र अमेरिकासँगको सम्बन्ध बलियो रहने अपेक्षा राखेको बताएको छ। मन्त्रालयले भनेको छ, “नाइजेरियाले जात, धर्म वा सम्प्रदायको आधारमा सबै नागरिकको रक्षा गर्नेछ।”
गत वर्ष नाइजरबाट करिब १,००० अमेरिकी सैनिक फिर्ता भएपछि पश्चिम अफ्रिकामा अमेरिकी सैन्य उपस्थिति घटेको छ।
अफ्रिकामा अमेरिकाको सबैभन्दा ठूलो सैन्य बेस पूर्वी अफ्रिकाको जिबुटीमा रहेको छ, जहाँ ५ हजार भन्दा बढी सैनिक तैनाथ रहेका छन्।
ट्रम्पले सन् २०१८ मा आफ्नो पहिलो कार्यकालमा पनि नाइजेरियालाई धार्मिक स्वतन्त्रताको चिन्ताजनक देशको सूचीमा राखेका थिए। तर सन् २०२१ मा तत्कालीन राष्ट्रपति जो बाइडेनले त्यसलाई सूचीबाट हटाएका थिए।
ट्रम्पले दाबी गरेका छन् कि “नाइजेरियामा हजारौँ इसाईहरूलाई कट्टर इस्लामिकहरूले मारिरहेका छन्”, तर उनले कुनै प्रमाण दिएका थिएनन्।
नाइजेरिया २०० भन्दा बढी जातीय समूहहरूको देश हो, जसमा इसाई, मुस्लिम र परम्परागत धर्म मान्नेहरू छन्। देशमा प्रायः सहअस्तित्व रहँदै आएको भए पनि कतिपय समयमा जातीय विभाजन र स्रोत–साधनका कारण हिंसा भड्किने गरेको छ।
पछिल्ला वर्षहरूमा इस्लामिक उग्रवादी समूह बोको हरामले देशको उत्तरपूर्वी भागमा आतङ्क फैलाउँदै आएको छ, जसले १५ वर्षमा दशौँ हजार मानिसको ज्यान लिएको छ। मानवअधिकार विशेषज्ञका अनुसार बोको हरामका अधिकांश पीडित मुस्लिम नै हुन्।