राष्ट्रपति ट्रम्पले किन गरे ‘एन्टिफा’लाई घरेलु आतङ्कवादी संगठनको रुपमा सूचीकृत ?
प्रकाशित मिति : आश्विन ५, २०८२ सोमबार
अमेरिकी राष्ट्रपति डोनाल्ड ट्रम्पले ‘एन्टिफा’ लाई घरेलु आतंकवादी संगठनको रूपमा घोषणा गर्ने कदम चालेका छन्। यो घोषणा उनले सेप्टेम्बर १० मा चार्ली किर्कको हत्यापछि उत्पन्न परिस्थितिलाई औंल्याउँदै गरेका हुन्। ट्रम्पको यो कदम विवादास्पद बनेको छ।
एन्टिफा, जसको अर्थ “फासीवादविरोधी आन्दोलन” हो, कुनै औपचारिक संगठन होइन। यो कुनै सदस्यता, नेतृत्व वा केन्द्रीय संरचना नभएको, बरु स्वतःस्फूर्त रूपमा बनेका विकेन्द्रित कार्यकर्ताहरूको सञ्जाल हो।
एन्टिफा समर्थकहरू प्रायः चरम दक्षिणपन्थी विचारधारा, जातिवाद र श्वेत वर्चस्ववादको विरुद्ध प्रदर्शन गर्छन्। उनीहरूले कहिलेकाहीँ सडक प्रदर्शन, प्रतिरोध, र प्रत्यक्ष तोडफोड वा हिंसात्मक विरोध पनि गर्ने गरेका छन्।
ट्रम्पले एक कार्यकारी आदेश जारी गर्दै एन्टिफालाई “एक सैन्यवादी, अराजकतावादी अभियान” भनेका छन्, जसले अमेरिकी सरकार र कानून प्रणालीलाई उल्ट्याउने आह्वान गर्छ।
उनले चार्ली किर्कको हत्यालाई “कट्टर वामपन्थी राजनीतिक हिंसा” भन्दै एन्टिफालाई देशमा देखिएको आतंकवादको जिम्मेवार ठहर्याएका छन्। यद्यपि, हालसम्म आक्रमणकारीलाई एन्टिफासँग जोड्ने कुनै प्रमाण सार्वजनिक भएको छैन।
विशेषज्ञहरूका अनुसार राष्ट्रपति ट्रम्पसँग एन्टिफालाई आतंकवादी संगठन घोषणा गर्ने कानुनी आधार छैन। अमेरिकामा विदेशी आतंकवादी संगठनलाई मात्र कानुनी रूपमा सूचीकृत गर्ने प्रावधान छ, घरेलु राजनीतिक विचारधारालाई अपराधीकरण गर्ने कुनै व्यवस्था छैन।
ग्लोबल प्रोजेक्ट अगेंस्ट हेट एन्ड एक्स्ट्रिमिज्मकी सहसंस्थापक हाइडी बेइरिचले यस घोषणालाई “निराधार र रहस्यमय” भनेकी छिन्। उनले एन्टिफा औपचारिक संगठन नभएकोले यसलाई आतंकवादी घोषणा गर्ने कुनै आधार नरहेको बताइन्।
विश्लेषकहरूले ट्रम्पको यो कदमले एन्टिफाका कथित सदस्यहरूलाई प्राथमिकतामा राखेर अनुसन्धान र गिरफ्तारी बढाउन सक्ने सम्भावना औंल्याएका छन्। यसअघि पनि ट्रम्पले २०२० मा जर्ज फ्लोइडको हत्यापछि भएका प्रदर्शनका क्रममा यस्तै घोषणा गरेका थिए, तर त्यो औपचारिक रूपमा कार्यान्वयन भएको थिएन।
यो कदमले ट्रम्पको दक्षिणपन्थी समूहहरूसँगको फरक व्यवहारलाई पनि उजागर गरेको छ। ट्रम्पले यसअघि ६ जनवरीको क्यापिटोल आक्रमणमा दोषी ठहरिएका प्राउडबोइज र ओथ किपर्स जस्ता समूहका सदस्यहरूलाई क्षमादान दिएका थिए।
ट्रम्पले चार्ली किर्कको हत्यालाई प्रमुख कारणको रूपमा देखाए पनि, यो घोषणा उनको राजनीतिक विचारधारा र समर्थन आधारसँग जोडिएको देखिन्छ।