मध्यावधि चुनावमा मस्कले डेमोक्र्याट उम्मेदवारहरूलाई समर्थन गरे गम्भीर परिणाम भोग्नुपर्ने ट्रम्पको चेतावनी
प्रकाशित मिति : जेष्ठ २४, २०८२ शनिबार
फोटो : रासस
अमेरिकी राष्ट्रपति डोनाल्ड ट्रम्पले एलन मस्कसँगको सम्बन्ध समाप्त भएको घोषणा गरेका छन । आफ्ना पूर्वघनिष्ठ सहयोगी मस्कसँगको सम्बन्धलाई सुधार गर्ने पक्षमा समेत आफु नरहेको उनले बताए ।
उनीहरूको सामाजिक सञ्जालमार्फत भएको विवादपछि ट्रम्पको यो टिप्पणी आएको हो ।
मस्कले ट्रम्पको निर्वाचन अभियानमा करोडौं डलर दान गरेका थिए । केही समयका लागि ह्वाइट हाउसमा सरकारी सल्लाहकारको भूमिकामा रहेका थिए । उनले ट्रम्पको मुख्य आर्थिक नीति – ‘बिग ब्यूटिफुल बिल’ – को कडा आलोचना गरेका थिए।
यो विधेयकले सरकारको खर्चमा तीव्र वृद्धि गराउने भन्दै मस्कले यसले सरकारको खर्च कटौती गर्न उनले डोजमा गरेका कामलाई कमजोर बनाउने चेतावनी समेत दिएका थिए । डोजको प्रमुखको रूपमा १२९ दिन कार्यसम्पादन गरेपछि मस्कले पद छोडेका थिए।
डोज छाडेपछि मस्कले आफ्नो सामाजिक सञ्जाल प्लेटफर्म एक्समा उक्त विधेयकलाई “घृणास्पद र विभत्स” भनेका थिए। तर उनले सुरुमा ट्रम्पको नाम स्पष्ट रूपमा भनेका थिएनन् ।
ट्रम्पले पत्रकारहरूसँग कुरा गर्दै मस्कप्रति “निराश” भएको बताएका थिए। त्यसको जवाफमा मस्कले एक्स मा ट्रम्पमाथि आक्रोश पोख्दै ट्रम्प उनीबिनाको सहयोगमा चुनाव जित्न सक्दैनथे, र ट्रम्पको नाम बदनाम वित्त व्यवसायी जेफ्री एपस्टिनसँग जोडिएको आरोप समेत लगाए ।
यद्यपि मस्कले ती पोष्टहरू पछि हटाएका छन् । एपस्टिनका वकिलले यस्ता आरोपहरू अस्वीकार गरेका छन्।
ट्रम्पले आफ्नो सामाजिक सञ्जालमा जवाफ दिँदै मस्कलाई “पागल” भएको भन्दै आलोचना गरे । साथै उनले संघीय सरकारका साथ रहेका मस्कका ठेक्काहरू काट्ने धम्कीसमेत दिएका छन्। ट्रम्पले भने, “ मस्क राष्ट्रपति पदको अपमान गरिरहेका छन् । त्यो अत्यन्त गलत हो।”
मक्स विश्वकै सबैभन्दा धनी व्यक्ति हुन् । उनले ट्रम्पको चुनाव अभियानमा लगभग २५० मिलियन डलर दान गरेका थिए । अब आगामी मध्यावधि चुनावमा ट्रम्पका आलोचक उम्मेदवारहरूको समर्थन गर्न सक्ने संकेत दिएका छन् ।
उक्त सम्भावनाबारे सोध्दा ट्रम्पले चेतावनी दिए, “यदि मस्कले डेमोक्र्याट उम्मेदवारहरूलाई समर्थन गरे भने त्यसका गम्भीर परिणामहरू भोग्नु पर्ने छ ।”
उप–राष्ट्रपति जे डी भान्सले भने , “मस्क यति धेरै आक्रामक बने कि अब उनलाई पार्टीमा फिर्ता स्वागत गर्न कठिन हुनेछ।”
यो घटनाक्रमले ट्रम्प र मस्कबीचको सम्बन्ध गम्भीररूपमा चिसिएको देखाएको छ । यसको अमेरिकी राजनीतिमा दीर्घकालीन प्रभाव पर्न सक्ने सम्भावना छ ।