रहेनन् ‘विश्वकै सबैभन्दा गरिब राष्ट्रपति’को रूपमा परिचित उरुग्वेका मुजिका
प्रकाशित मिति : बैशाख ३१, २०८२ बुधबार
FILE – TO HOLD – Uruguay’s former President Jose Mujica arrives to cast his vote in Montevideo, Uruguay, Oct. 26, 2014. (AP Photo/Natacha Pisarenko, File)
ल्याटिन अमेरिकी देश उरुग्वेका पूर्व राष्ट्रपति जोस मुजिकाको निधन भएको छ । ‘पेपे’ को नामले विश्वभर परिचित उनको मंगलबार ८९ वर्षको उम्रमा निधन भएको हो ।
उनले सन् २०१० देखि २०१५ सम्म उरुग्वेका राष्ट्रपतिको जिम्मेवारी सम्हालेका थिए । उनी आफ्नो साधारण जीवनशैली र जनताप्रतिको समर्पणका कारण ‘विश्वको सबैभन्दा गरिब राष्ट्रपति’ को रूपमा प्रसिद्ध थिए।
पूर्व गुरिल्ला नेता समेत रहेका मुजिकाले आफ्नो कार्यकालमा सामाजिक सुधार र गरिबी निवारणमा महत्त्वपूर्ण योगदान पुर्याएका थिए। उनले आफ्नो तलबको अधिकांश हिस्सा दान गर्ने र सादा जीवन बिताउने शैलीले विश्वभर चर्चा कमाएका थिए।
उरुग्वेका वर्तमान राष्ट्रपति यामान्डू ओर्सीले सामाजिक सञ्जाल एक्समा श्रद्धाञ्जली व्यक्त गर्दै भने, ‘पेपे, तपाईंले हामीलाई दिएको हरेक कुरा र जनताप्रतिको तपाईंको गहिरो प्रेमका लागि धन्यवाद। तपाईंको विरासत सधैं हाम्रो मार्गदर्शन गर्नेछ।’
मुजिकाको निधनको कारणबारे आधिकारिक जानकारी प्राप्त भएको छैन । तर उनी केही समयदेखि ओसोफेजियल क्यान्सरबाट पीडित थिए। उनको निधनले उरुग्वे र विश्वभरका समर्थकहरूमा गहिरो शोक उत्पन्न भएको छ।