न्यूयोर्क सिटीको हडसन नदीमा हेलिकप्टर दुर्घटना हुँदा कम्तिमा ६ जनाको मृत्यु
प्रकाशित मिति : चैत्र २८, २०८१ बिहीबार
न्यूयोर्क सिटीको हडसन नदीमा हेलिकप्टर दुर्घटना हुँदा कम्तीमा ६ जनाको मृत्यु भएको छ। हेलिकप्टर दिउँसो ३ बजेर १५ मिनेटतिर म्यानहट्टनको वेस्ट साइड हाइवे र स्प्रिङ स्ट्रिट नजिकै दुर्घटनाग्रस्त भएको हो।
प्रहरीले पियर ४० र वेस्ट साइड हाइवे नजिकै हेलिकप्टर दुर्घटनाग्रस्त भएको बताएको छ। हेलिकप्टरमा एक पाइलट, दुई वयस्क र तीन बच्चा सवार थिए। अहिलेसम्म सबै छ जनाको शव बरामद गरिसकिएको छ।
प्रारम्भिक रिपोर्टअनुसार पाँच पीडितहरू स्पेनबाट न्यूयोर्क सिटी भ्रमण गर्न आएका पर्यटक थिए। फेडरल एभिएसन एडमिनिस्ट्रेशनका अनुसार उक्त हेलिकप्टरलाई बेल २०६ हेलिकप्टरको रूपमा पहिचान गरिएको छ।
आपतकालीन कर्मचारीहरू बेलुकासम्म घटनास्थलमा खटिएका थिए। प्रहरीले चालकहरूलाई आसपासका क्षेत्रमा आपतकालीन सवारी साधन र ट्राफिक ढिलाइको अपेक्षा गर्न चेतावनी दिएको छ।
मेयर एरिक एडम्सले सामाजिक सञ्जालमा पोस्ट गर्दै हडसन नदीमा भएको हृदयविदारक र दुखद दुर्घटनाको घटनास्थलमा टोली पुगेको बताएका छन्। अग्निनियन्त्रक र प्रहरीले नदीको न्यूजर्सीतर्फ उद्धारकर्ताहरूलाई सहयोग गरिरहेको जनाउँदै यसबीचमा म्यानहट्टनको पियर ४० नजिकको क्षेत्रमा नजान सुझाव दिएका छन्।
सामाजिक सञ्जालमा धेरै भिडियोहरूले दुर्घटनापछिको क्षण कैद गरेका छन्।