अमेरिकामा टिकटकको बिक्रीका लागि समयसीमा ७५ दिन बृद्धि
प्रकाशित मिति : चैत्र २२, २०८१ शुक्रबार
अमेरिकी राष्ट्रपति डोनाल्ड ट्रम्पले टिकटकको बिक्री म्याद ७५ दिनले लम्ब्याएका छन् । अब टिकटकले चीनस्थित मातृ कम्पनीसँग सम्बन्ध तोड्न थप ७५ दिन समय पाएको छ । ह्वाइट हाउसको टिकटक सम्झौताले सबै आवश्यक स्वीकृतिहरू हस्ताक्षर गर्न थप कामको आवश्यकता भएको ट्रम्पले ट्रुथ सोशलमा लेखेका छन् ।
उनले प्रशासनले चीनसँग राम्रो विश्वासमा काम जारी राख्ने आशा गरेको ट्रम्पले बताएका छन् । आफूहरु टिकटक बन्द भएको नचाहने र टिकटक एवं चीनसँग सम्झौता पूरा गर्न तत्पर रहेको ट्रम्पले आफ्नो सामाजिक सञ्जाल साइटमा लेखेका छन् ।
वार्ताकारहरूले शुक्रबार बिहान टिकटकमा सम्झौता घोषणा गर्ने अपेक्षा गरेका थिए । तर टिकटक सम्झौता समन्वय गर्न सहयोग गरिरहेका राष्ट्रिय सुरक्षा परिषद्का एक अधिकारीलाई बर्खास्त गरिएकाले योजनालाई जटिल बनाएको थियो ।
शुक्रबारको राहतले टिकटकलाई यो वर्षको उतारचढावपूर्ण समयमा केही सास फेर्ने ठाउँ प्रदान गरेको छ। जनवरीमा एक संघीय कानुन लागू भएको थियो जसले बाइटडान्सबाट अलग नभएमा देशव्यापी रूपमा यो सेवालाई कानुनी रूपमा प्रतिबन्ध लगाउने तय गरेको थियो ।
सन् २०२४ मा संसदले राष्ट्रिय सुरक्षाको डरका कारण यो प्रतिबन्ध पारित गरेको थियो, किनभने आधा भन्दा बढी अमेरिकीहरूले प्रयोग गर्ने एप अमेरिकाको विदेशी शत्रु चीनद्वारा नियन्त्रित हुनुहुँदैन भन्ने दुई पार्टीको भारी समर्थन थियो। टिकटकले यो प्रतिबन्धलाई स्वतन्त्र अभिव्यक्ति अधिकारको उल्लंघन भन्दै सर्वोच्च अदालतसम्म लडेपनि उच्च अदालतले सन् २०२५ को सुरुमा यो कानुनलाई सदर गरेको थियो ।
जनवरी १८ को साँझदेखि एप १४ घण्टासम्म बन्द भएको थियो । तर ट्रम्पले पदभार ग्रहण गरेपछि प्रतिबन्धको कार्यान्वयन स्थगन गर्ने आदेशमा हस्ताक्षर गर्ने वाचा गरेपछि यो अर्को दिन फेरि चल्न थाल्यो।
ट्रम्पले पदभार ग्रहणपछि एक कार्यकारी आदेशमा हस्ताक्षर गरेर प्रतिबन्धको सुरुवातलाई प्रभावकारी रूपमा ७५ दिन पछाडि धकेलेका थिए । त्यो विस्तार अप्रिल ५ मा समाप्त हुने तय भएको थियो। नयाँ आदेशले यसलाई थप ७५ दिन पछाडि धकेलेको छ ।
कानुनी विज्ञहरूका अनुशार ट्रम्पको ढिलाइले टिकटक प्रतिबन्ध रोक्दैन, अर्थात् टिकटकले चीनसँग सम्बन्ध राखेर अमेरिकामा सञ्चालन गर्नु प्राविधिक रूपमा गैरकानुनी छ। तैपनि ट्रम्प र उनको प्रशासनले टिकटक र यसका सेवा प्रदायकहरूलाई अमेरिकी अधिकारीहरूले कानुनअन्तर्गत कसैलाई पनि मुद्दा नचलाउने आश्वासन दिएका कदमहरूले यो लोकप्रिय एपलाई संघीय कानुनको उल्लंघनमा सञ्चालन भए पनि अनलाइन रहन पर्याप्त भएको छ।