आफ्ना नागरिकलाई बेलायतले भन्यो – ‘अमेरिकाको यात्रा गर्दा सतर्क रहनू’
प्रकाशित मिति : चैत्र ८, २०८१ शुक्रबार
संयुक्त राज्य अमेरिकाले अध्यागमन नियम कडा बनाउँदै लगेपछि बेलायतले आफ्ना नागरिकहरूलाई अमेरिकाको यात्रा गर्दा सतर्क रहन आग्रह गरेको छ। बिहीबार बेलायती विदेश मन्त्रालयले आफ्नो आधिकारिक सल्लाह अद्यावधिक गर्दै अमेरिकी अध्यागमन कानुन उल्लङ्घन गर्ने ब्रिटिश राहदानी धारकहरूलाई गम्भीर परिणाम भोग्नुपर्ने चेतावनी दिएको हो ।
बेलायती विदेश मन्त्रालयको यो चेतावनी जर्मनीले आफ्नो यात्रा सल्लाह पुनः मूल्याङ्कन गरेपछि आएको हो। हालै तीन जना जर्मन नागरिकहरूलाई अमेरिकी प्रवेशद्वारमा हिरासतमा लिइएको थियो। जर्मनी सरकारले अमेरिकी अध्यागमन नियम थप कठोर भइरहेको भन्दै आफ्ना नागरिकहरूलाई सचेत गराएको छ।
बेलायती विदेश मन्त्रालयका अनुसार, फेब्रुअरीको सुरूआतमा मात्र अमेरिकी अधिकारीहरूले ‘प्रवेश नियमहरू निर्धारण र कार्यान्वयन गर्छन्’ भन्ने सामान्य जानकारी दिएको थियो। तर, हाल आएर मन्त्रालयले ‘सबै प्रवेश, भिसा र अन्य सर्तहरू पालना गर्न’ नागरिकहरूलाई स्पष्ट निर्देशन दिएको छ।
विदेश मन्त्रालयले भनेको छ, ‘संयुक्त राज्य अमेरिकाका अधिकारीहरूले प्रवेश नियमहरू कडाइका साथ कार्यान्वयन गर्छन्। यदि तपाईंले नियम उल्लङ्घन गर्नुभयो भने, तपाईंलाई पक्राउ वा हिरासतमा राख्न सकिन्छ।’
अमेरिकाको दक्षिणी सिमानामा प्रवेश प्रयास गर्दा तीन जना जर्मन नागरिकहरूलाई हिरासतमा लिइएपछि जर्मनी सरकारले अमेरिकी अध्यागमन प्रक्रियामा प्रवेश सुनिश्चित छैन भन्ने कुरा उल्लेख गर्दै यात्रा सल्लाह अद्यावधिक गरेको थियो।
यस्तै, हालै न्यूयोर्क टाइम्सले क्यानाडाकी एक महिलालाई अमेरिकी अध्यागमन तथा सीमा सुरक्षा अधिकारीहरूले हिरासतमा लिएको रिपोर्ट सार्वजनिक गरेको थियो।
ट्रम्प प्रशासनले अमेरिकी सीमामा प्रवेश प्रक्रियामा कडाइ गर्ने प्रतिबद्धता जनाएको छ। यसले मित्र राष्ट्रहरूका नागरिकहरूलाई समेत प्रभावित पार्ने देखिएको छ। बेलायत र जर्मनी जस्ता देशहरू अब आफ्ना नागरिकहरूलाई अमेरिकी प्रवेश नियमबारे सतर्क गराउँदै छन्।