ह्वाइट हाउस ओभल अफिसमा बाझाबाझ, ट्रम्प र भ्यान्सद्वारा जेलेन्स्कीलाई ठूलो स्वरमा गाली
प्रकाशित मिति : १६ फाल्गुन २०८१, शुक्रबार
राष्ट्रपति ट्रम्प र उपराष्ट्रपति जेडी भान्सले शुक्रबार युक्रेनका राष्ट्रपति भोलोडिमिर जेलेन्स्कीलाई ठूलो स्वरमा गाली गरेका छन् जुन आधुनिक समयमा अमेरिकी राष्ट्रपति र विदेशी नेताबीच ओभल अफिसमा देखिएको र टेलिभिजनमा प्रशारण पहिलो विष्फोटक बाझाबाझ थियो ।
ट्रम्प र भान्सले जेलेन्स्कीलाई रुससँगको युद्धमा अमेरिकी समर्थनको लागि पर्याप्त कृतज्ञ नभएकोमा आलोचना गरेका छन् । उनीहरुले अमेरिकाको जुनसुकै शर्तमा शान्ति सम्झौता गर्न जेलेन्स्कीलाई पार्न खोजेका थिए । आवाज चर्को बन्दै गएपछि र आक्रोश बढ्दै गएपछि ट्रम्पले जेलेन्स्कीद्वारा भने अनुशार नगरिए युक्रेनलाई पूर्ण रूपमा त्याग्ने धम्की दिएका थिए ।
Watch this carefully. Very important.
pic.twitter.com/wdM3XdbrH1— Elon Musk (@elonmusk) February 28, 2025
जेलेन्स्कीले ओभल अफिसमा आएर अमेरिकी समाचार मिडियाको अगाडि आफ्नो मुद्दा राख्नु तथा अपमानजनक भएको भान्सले बताए । ट्रम्प आवेशमा आएर जेलेन्स्कीलाई वास्तवमै राम्रो स्थितिमा नभएको र तेश्रो विश्व युद्धसँग जुवा खेल्दै गरेको आरोप लगाए ।
टेलिभिजन क्यामेराको अगाडिको यो दृश्य ओभल अफिसमा सार्वजनिक रूपमा सबैभन्दा नाटकीय क्षणहरू मध्ये एक थियो । जसले ट्रम्पले पदभार ग्रहण गरेदेखि अमेरिका र युक्रेन बीचको कट्टरपन्थी विभाजनलाई देखाएको छ । ट्रम्पले युक्रेनलाई युद्ध सुरु गरेकोमा झूटो आरोप लगाउँदै र जेलेन्स्कीलाई तानाशाह भन्दै रूसलाई प्रभावकारी रूपमा साथ दिएका छन्।
जेलेन्स्कीले हतारमा शुक्रबार वाशिंगटनको भ्रमण गर्नुको उद्देश्य ट्रम्पले माग गरेको एक सम्झौतामा दरारलाई सहज बनाउन र टुंगो लगाउनका लागि थियो । जसमा युक्रेनले राष्ट्रपति बाइडेन र संसदले प्रदान गरेको सैन्य सहायता फिर्ता गर्न कैयन बिलियन डलरको खनिज अधिकार हस्तान्तरण गर्ने थियो।
ट्रम्पले बिहीबार पत्रकारहरूलाई तानाशाहको टिप्पणी गरेको कुरा आफूलाई याद नभएको भन्दै र युक्रेनी नेताप्रति सम्मान व्यक्त गर्दै जेलेन्स्कीसँग राम्रो व्यवहार गर्न तयार देखिन्थे। उनले श्री जेलेन्स्कीलाई शुक्रबार बिहान वेस्ट विंगको ढोकामा सम्मान गार्डको साथ स्वागत गरेका थिए । उनीहरूले विनम्रतापूर्वक हात मिलाएपनि न्यानोपन नभएको प्रष्ट देखिन्थ्यो ।
यद्यपि उनीहरू पत्रकारहरूको उपस्थितिमा ओभल अफिसमा बसेको केही समयपछि मुठभेड तुरुन्तै शत्रुतापूर्ण भयो। जेलेन्स्कीले रुससँगको युद्धको इतिहासलाई व्याख्या गर्न खोजेका थिए । मस्कोले पहिलो पटक २०१४ मा क्रिमिया र पूर्वी युक्रेनको क्षेत्र कब्जा गरेको उनले बताएका थिए ।
तर भान्सले तीव्र रूपमा अवरोध गरेका थिए । जेलेन्स्कीले युक्रेनमा जनशक्ति अभावको बारेमा भान्सको भनाइको जवाफ दिने प्रयास गर्दै अमेरिकाले कुनै दिन रूसबाट खतरा महसुस गर्नसक्ने बताएका थिए । रुस र अमेरिकाको बीचमा अहिले राम्र्रो समुद्र भएकाले त्यो खतरा अहिले महसुस नगरेपनि भविष्यमा महसुस गर्ने जेलेन्स्कीले बताएका थिए । जेलेन्स्कीको यो भनाईबाट ट्रम्प उत्तेजित भए । आफूहरुले के महसुस गर्ने भन्ने कुरा नभन्न भन्दै ट्रम्पले जेलेन्स्कीलाई अवरोध गरेका थिए ।
ओभल अफिसमा बाझाबाझ पछि राष्ट्रपति ट्रम्पले एक विज्ञप्ति जारी गर्दै उनी र जेलेन्स्कीको धेरै अर्थपूर्ण बैठक भएको बताएका छन् । तर उनले अमेरिका संलग्न भएमा युक्रेनी नेता शान्तिको लागि तयार नभएको निर्धारण गरेका थिए। जेलेन्स्की शान्तिको लागि तयार भएपछि फर्केर आउन सक्ने टम्पले बताएका छन् ।