इजरायलले कैदीलाई रिहा गर्न मानेन, युद्धविराम संकटमा पर्ने संभावना
प्रकाशित मिति : फाल्गुन १०, २०८१ शनिबार
इजरायल र हमासबीचको युद्धविराम संकटमा पर्ने संभावना बढेको छ ।
शनिबार हमासले ६ जना इजरायली बन्धकलाई रिहा गरेको बदलामा मुक्त गरिने भनिएका ६०२ जना प्यालेस्टिनी कैदीहरुलाई इजरायलले नछोडेपछि युद्धविराम संकटमा पर्ने हो कि भन्ने आशंका बढेर गएको हो ।
इजरायलले कैदीलाई रिहा गर्ने कार्य अनिश्चितकालका लागि भनेर स्थगित गरेको छ । इजरायलको यो निर्णय ६ जना इजरायली बन्धकलाई हमासले मुक्त गरेपछि आएको हो ।
हमासले अरु बन्धक हस्तान्तरण गर्ने सुनिश्चित नहुँदासम्म कैदीहरुलाई नछोडिने इजरायलका प्रधानमन्त्री बेञ्जामिन नेतान्याहूले बताएका छन ।
हमासले बन्धकहरु मुक्त गर्दा आयोजना गर्ने समारोहलाई प्रधानमन्त्री नेतान्याहूले राम्रो मानिरहेका छैनन । अवका बन्धक मुक्ती बिना समारोह हुनुपर्ने उनको भनाईछ ।
युद्धविरामको पहिलो चरणमा बन्दीगृहमा मृत्यु भएका ४ बन्धकहरूको हस्तान्तरण मात्र बाकि छ । युद्धविरामको दोस्रो चरणमा अन्य जीवित बन्धकहरूको रिहाइको कुनै व्यवस्थापन गरिएको छैन ।
मध्यस्थकर्ताहरूले सम्झौतालाई पुन सहि मार्गमा ल्याउन र युद्धविराम भंग हुनबाट जोगाउन कडा परिश्रम गर्ने अनुमान गरिएको छ ।
७ अक्टोबर २०२३ मा हमास र इजरायलबीच युद्ध सुरु भएपछि गाजा क्षेत्र अशान्त छ ।