अमेरिकामा २४ बर्षपछिको भयानक विमान दुर्घटना, ६४ यात्रुमध्ये जीवितै उद्दार गर्न सकिने आशा समाप्त
प्रकाशित मिति : माघ १७, २०८१ बिहीबार
अमेरिकाको वासिंटन डिसीमा सेनाको हेलिकप्टरसँग यात्रुवाहक विमान ठोक्किदा भएको दुर्घटनामा कोही पनि जीवित रहेको अपेक्षा गरिएको छैन । संघीय उड्डयन प्रशासन र रक्षा अधिकारीहरुका अनुसार ६४ जना बोकेको यात्रुवाहक विमान वाशिंगटन, डीसी बाहिर रेगन राष्ट्रिय विमानस्थल नजिकै अमेरिकी सेनाको ब्ल्याक हक हेलिकप्टरसँग ठोक्किएको थियो ।
अमेरिकन एयरलाइन्सले विमानमा ६० यात्रु र चार चालक दलका सदस्य रहेका थिए । साथै हेलिकप्टर तीन जनाको चालक दलका साथ उडिरहेको थियो ।
हेलिकप्टरमा कुनै पनि उच्च सैनिक अधिकारी भने थिएनन् । अहिलेसम्म २८ जनाको शव निकालिएको छ भने अब कसैलाइै जीवितै उद्दार गर्ने आशा अधिकारीहरुले मारिसकेका छन् ।
पीएसएले यो उडान संचालन गरेको थियो । यो एक क्षेत्रीय एयरलाइन हो जसले अमेरिकन एयरलाइन्सका तर्फबाट उडानहरू सञ्चालन गर्दछ। हिजो बेलुका ९ बजेतिर हेलिकप्टरसँग ठोक्किएपछि विमान एयरपोर्ट नजिकै पोटोमाक नदीमा खसेको थियो ।
अमेरिकामा व्यवासायिक एयरलाइन्सको अन्तिम घातक दुर्घटना कोलगन एयर फ्लाइट ३४०७ थियो, जुन फेब्रुअरी १२, २००९ मा बफेलो नजिक दुर्घटनाग्रस्त हुँदा ५० जनाको मृत्यु भएको थियो । अमेरिकन एयरलाइन्स दुर्घटना भने पछिल्लो पटक नोभेम्बर २००१ मा भएको थियो । न्युयोर्क क्वीन्सको बेले हार्वर नजिक भएको दुर्घटनामा २५१ यात्रु र ९ चालकदलका सदस्यसहित २६० जनाको मृत्यु भएको थियो ।