चरा ठोक्किँदा न्युयोर्कबाट उडेको विमान आपतकालीन अवतरण गर्न बाध्य
प्रकाशित मिति : मंसिर २८, २०८१ शुक्रबार
न्युयोर्कको लागार्डिया विमानस्थलबाट प्रस्थान गरेको अमेरिकन एयरलाइन्सको १७२२ उडान बिहीबार राति विमानको इन्जिनमा चरा छिर्दा आपतकालीन अवतरण गर्न बाध्य भएको छ । चरा ठोक्किएपछि विमान जोन अफ केनेडी विमानस्थलमा आकस्मिक अवतरण गरेको थियो ।
साँझ ७ः२० बजेपछि विमान १७२२ लागार्डियाबाट उडेको थियो ।विमान नर्थ क्यारोलिनाको शार्लोट डगलस अन्तर्राष्ट्रिय विमानस्थलमा अवतरण गर्ने तालिका थियो।
तर चरा दायाँतर्फको इन्जिनमा प्रवेश गर्दा ठूलो क्षति पुगेका कारण विमानलाई आफ्नो मार्ग परिवर्तन गरेर जोन अफ केनेडी विमानस्थलतर्फ फर्कन बाध्य बनाइएको पोर्ट अथरिटी अफ न्युयोर्क / न्यु जर्सीका अधिकारीहरूले बताएका छन्।
एक्समा पोस्ट गरिएको भिडियो क्लिपमा इन्जिन भित्र चरा छिरेको देख्न सकिन्छ भने विमानको पुच्छरतर्फ सानो विस्फोट पनि भएको देखिन्छ।
घटनामा कोही पनि घाइते नभएको अमेरिकन एयरलाइन्सले एक विज्ञप्तिमा जनाएको छ। शार्लोटतर्फ गइरहेको उक्त उडान शुक्रबार बिहान पुनः प्रस्थान गरेको छ । यात्रुहरूलाई रातका लागि होटलमा बस्ने व्यवस्था गरिएको एयरलाइन्सले जानकारी दिएको छ।