आज अमेरिकामा राष्ट्रपति चुनावको मुख्य दिन, सबैको नजर ७ ब्याटलग्राउण्ड राज्यतिर
प्रकाशित मिति : कार्तिक २०, २०८१ मंगलबार
आज अमेरिकामा राष्ट्रपति चुनावको मुख्य दिन सबैको नजर ७ वटा ब्याटलग्राउण्ड राज्यतिर रहेको छ । अमेरिकी राष्ट्रपतिमा निर्वाचित हुनका लागि आवश्यक पर्ने २७० इलेक्टोरल मतमध्ये डेमोक्रेटिक पार्टीका तर्फबाट राष्ट्रपति उम्मेदबार कमला ह्यारिसले २२६ इलेक्टोरल मत जित्ने निश्चित भएको छ भने रिपब्लिकन राष्ट्रपति उम्मेदबार डोनाल्ड ट्रम्पले २१९ इलेक्टोरल मत जित्ने निश्चित भएको छ ।
बाँकी ७ वटा ब्याटलग्राउण्ड राज्यहरुबाट जसले २७० इलेक्टोरल मत पुराउन सफल हुन्छ, त्यही उम्मेदबार अमेरिकी राष्ट्रपतिमा निर्वाचित हुनेछन् । विसकन्सिन, नेभाडा, मिसिगन, एरिजोना, पेन्सिलभेनिया, नर्थ क्यारोलिना र जर्जियाले अबको अमेरिकी राष्ट्रपति को हुने भन्ने निर्धारण गर्ने भएकाले सबैको नजर ती राज्यतिर भएको हो ।
कमला ह्यारिसलाई २२६ इलेक्टोरल भोट हुने राज्यमा प्रष्ट रूपमा मन पराइएको छ भने डोनाल्ड ट्रम्पलाई २१९ मत हुने राज्यहरूमा प्रष्ट रुपमा मन पराइएको छ। जित्नको लागि ह्यारिसलाई सात ब्याटलग्राउण्ड राज्यहरूबाट कम्तिमा ४४ र ट्रम्पलाई ५१ इलेक्टोरल मत चाहिन्छ । न्युयोर्क टाइम्स र सिएना कलेजको पछिल्लो मत सर्वेक्षणले नेक टु नेक प्रतिस्पर्धा देखाएको छ ।
अमेरिकामा राष्ट्रपतिको चुनावमा निर्वाचित हुनका लागि कम्तीमा २७० इलेक्टोरल मत ल्याउन आवश्यक हुन्छ भने हरेक राज्यका लागि इलेक्टोरल मतभार फरक फरक तोकिएको हुन्छ । अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।
जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ । ५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । अमेरिकामा अधिकांश राज्यमा विगतको इतिहास र पार्टीको प्रभावको आधारमा चुनाव कस्ले जित्छ भन्ने लगभग सुनिश्चित जस्तै नै हुने गर्छ । तर अमेरिकाका केही राज्यहरु त्यस्ता राज्यहरु छन् जसले पटकपटक आफ्नो चुनावी परिणाम बदल्ने गरेका छन् । त्यसैले अमेरिकी राष्ट्रपति चुनाव कस्ले जित्छ भन्ने कुराको निर्धारण यी राज्यहरुको चुनावी परिणाममा निर्भर गर्ने गरेको छ ।
१५ इलेक्टोरल मतभार रहेको मिसिगनमा २०१६ मा ट्रम्पले जितेपनि २०२० मा बाइडेनले जितेका थिए । २०१६ अगाडिका ७ वटा राष्ट्रपति चुनावमा पनि डेमोक्रेटिक पार्टीका उम्मेदबारले नै जितेका थिए । त्यस्तै १९ इलेक्टोरल मतभार रहेको पेन्सिलभेनियामा पनि २०१६ मा ट्रम्पले र २०२० मा बाइडेनले जितेका थिए । तर २०१६ अगाडिका ६ वटा राष्ट्रपति चुनावमा पनि डेमोक्रेटिक पार्टीका उम्मेदबारले नै जितेका थिए । १० इलेक्टोरल भोट रहेको विसकन्सिनमा पनि २०१६ मा ट्रम्पले र २०२० मा बाइडेनले जितेका थिए । तर २०१६ अगाडिका ७ वटा राष्ट्रपति चुनावमा पनि डेमोक्रेटिक पार्टीका उम्मेदबारले नै जितेका थिए ।
नर्थ क्यारोलिनामा सन् २००८ मा एकपटक बराक ओबामाले जितेका थिए, त्योबाहेक १९८० देखिका हरेक चुनावमा रिपब्लिकन राष्ट्रपति उम्मेदबारले जित्दै आएका छन् । अझ यसपटक नर्थ क्यारोलिनाको इलेक्टोरल मतभार १५ बाट बढेर १६ पुगेको छ । डेमोक्रेटिक उम्मेदबारलाई राष्ट्रपति चुनावमा नर्थ क्यारोलिनामा जित्न सहज छैन । त्यस्तै ११ इलेक्टोरल मतभार रहेको एरिजोनामा सन् २०२० मा जो बाइडेनले जितेपनि त्यसअगाडिका ६ वटा राष्ट्रपति चुनावमा रिपब्लिकन उम्मेदबारले लगातार जितेका थिए ।
त्यस्तै १६ इलेक्टोरल मतभार रहेको जर्जियामा सन् २०२० को चुनावमा बाइडेनले जितेपनि त्यसअगाडिका ६ वटा राष्ट्रपति चुनावमा रिपब्लिकन उम्मेदबारले लगातार जितेका थिए । त्यस्तै अर्को राज्य नेभाडामा ६ इलेक्टोरल मतभार रहेको छ । यो राज्यमा पछिल्ला ४ वटा राष्ट्रपतिको चुनावमा डेमोक्रेटिक पार्टीका उम्मेदबारले जितेपनि २००२ र २००४ को चुनावमा रिपब्लिकनले जितेका थिए ।