इजरायलसंग हनिया हत्याको बदला कुनैपनि बेला लिनसक्ने इरानको चेतावनी
प्रकाशित मिति : भाद्र ८, २०८१ शनिबार
इरानका विदेशमन्त्री सैयद अब्बास अराग्चीले हमासका पोलिटब्यूरो प्रमुख इस्माइल हनियाको हत्याप्रति देशको प्रतिक्रिया ‘विचारपूर्वक, सटीक र व्यवस्थित’ हुने बताउनुभएको छ ।
उहाँले आफ्ना जर्मन, फ्रान्सेली र बेलायती समकक्षीहरूसँगको फोन कुराकानीमा उक्त कुरा बताउनुभएको हो ।
इरानी अधिकारीहरूले हानियाको हत्या गर्ने इजरायलको कारबाहीबारे समीक्षा गरिरहेको उहाँले बताउनुभयो ।
हानियाको हत्याका लागि इजरायललाई सजाय दिने इरानको अधिकारलाई जोड दिँदै अराग्चीले भन्नुभयो इरानको राष्ट्रिय सुरक्षा र सार्वभौमिकताविरुद्ध इजरायलको आक्रमणको तेहरानले निश्चित रूपमा जवाफ दिनेछ र यो जवाफ उचित र व्यवस्थित हुनेछ ।
ठीक समयमा र उपयुक्त विधि प्रयोग गरी बदला लिइनेछ उहाँले भन्नुभयो ।
इरानका राष्ट्रपति मसुद पेजेस्कियानको सपथ ग्रहण समारोहमा भाग लिन इरान पुगेका हानियाको तेहरानस्थित निवासमा गत जुलाई ३१ मा भएको आक्रमणमा हनिया र उहाँका अङ्गरक्षकसहितको मृत्यु भएको थियो ।
इरानले आक्रमणको लागि इजरायल जिम्मेवार रहेको ठहर गरेको छ । इजरायलले आक्रमणमा आफ्नो संलग्नताको पुष्टि वा खण्डन गरेको छैन ।