बुद्धएयरको जहाज भैरहवामा ठुलो दुर्घटनाबाट जोगियो , सबै यात्रु सकुशल
प्रकाशित मिति : असार २७, २०८१ बिहीबार
गौतमबुद्ध अन्तर्राष्ट्रिय विमानस्थल भैरहवामा अवतरणका क्रममा बुद्धएयरको जहाज गएराति चिप्लिएर धावनमार्गको किनारमा पुगेको छ ।
जिल्ला प्रहरी कार्यालय रुपन्देहीका प्रहरी प्रवक्ता एवं प्रहरी नायब उपरीक्षक मनोहरप्रसाद भट्टका अनुसार जहाज चिप्लिँदा जहाजको चक्काले भुई माटो छुन पुगेको थियो ।
काठमाडौँबाट गएराति साढे ९ बजे उडान भरेको ८०५ नम्बरको सो जहाजले विमानस्थलको पूर्वबाट पश्चिमतर्फ अवतरण गर्नेक्रममा चिप्लिन पुगेको हो ।
प्रवक्ता भट्टका अनुसार जहाजमा चालक दलका सदस्यसहित ५९ यात्रु सवार थिए । जहाज अहिले पनि धावनमार्गमै रहेको कारण विमानस्थल बन्द रहेको प्रहरी प्रवक्ता भट्टले जानकारी दिनुभयो ।
गएराति नै बुद्धएयरको प्राविधिक टोली र सुरक्षाकर्मीले जहाजलाई तानेर सुरक्षित स्थानतर्फ ल्याउने प्रयास असफल भएको बताइएको छ ।
काठमाण्डौबाटै बुद्धएयरको थप प्राविधिक टोली भैरहवातर्फ आउने क्रम रहेको उहाँले बताउनुभयो ।