प्रधानमन्त्रीले असार २८ गते विश्वासको मत लिने , संसद सचिवालयमा पत्राचार
प्रकाशित मिति : असार २१, २०८१ शुक्रबार
प्रधानमन्त्री पुष्पकमल दाहाल ‘प्रचण्ड’ले यही असार २८ गते शुक्रबार प्रतिनिधिसभामा विश्वासको मत लिने व्यवस्थाका लागि संसद् सचिवालयलाई पत्राचार गर्नुभएको छ ।
प्रधानमन्त्री दाहालले सङ्घीय संसद्का महासचिवलाई आज पत्र पठाएर उक्त दिन विश्वासको मतका लागि प्रतिनिधिसभासमक्ष प्रस्ताव राख्नुपर्ने भएकाले आवश्यक व्यवस्था मिलाउन अनुरोध गर्नुभएको हो ।
कांग्रेस एमालेबीच नयाँ गठबन्धनको सहमति बनेपछि एमालेले सरकारमाथिको समर्थन फिर्ता लिएको हुनाले प्रधानमन्त्री दाहालले संवैधानिक व्यवस्थाअनुसार एकमहिना भित्रमा संसदबाट विश्वासको मत लिन लाग्नु भएको हो ।
सरकारलाई समर्थन गरेको कुनै दलले समर्थन फिर्ता लिएमा संविधानको धारा १०० को उपधारा २ बमोजिम ३० दिनभित्र विश्वासको मत लिनुपर्ने प्रावधान छ।
२७५ सदस्यीय प्रतिनिधिसभामा बहुमतका लागि १३८ मत चाहिन्छ, जबकि अहिलेसम्म प्रचण्डसँग माओवादी ३२, रास्वपा २१ , एकीकृत समाजवादी १० र अशोक राई नेतृत्वको जसपा ७ को गरेर ७९ मत मात्र छ ।
विपक्षमा नयाँ सरकार गठन गर्ने सहमति गरिसकेका कांग्रेस ८८ र एमाले ७९ गरी १६७ मत देखिन्छ ।