३ मंसिर २०८३, बिहिबार| Thursday, November 19, 2026
अध्यागमन

बेलायतमा अवैध रुपमा काम गरिरहेका १२ भारतीय पक्राउ, प्रत्येकका लागि ६० हजार पाउण्ड जरिवाना

बेलायतको वेष्ट मिडल्याण्डको टिप्टनमा बेड बनाउने कारखानामा अध्यागमनको छापामा १२ जना भारतीयहरु पक्राउ परेका छन् । भिसाका शर्तहरु उल्लंघन गर्दै गैरकानुनी रुपमा काम गरेको अभियोगमा उनीहरुलाई पक्राउ गरेर हिराशतमा लिइएको छ । पक्राउ पर्नेमा ११ जना पुरुष र १ जना महिला रहेका छन् ।

झण्डै ३० जना अधिकारीहरु छापामार्न पुग्दा गैरकानुनी रुपमा काम गरिरहेकाहरुमध्ये कोही भाग्ने प्रयास गरेका थिए भने कोही काठको प्यालेट र गद्दाको थुप्रोको बीचमा लुक्ने प्रयास गरेका थिए ।

वेस्ट मिडल्याण्डको टिप्टनमा उनीहरुले अवैधरुपमा काम गरेकोबारे गोप्य सुचना प्राप्त गरेपछि अध्यागमनले छापा मारेको थियो । एउटा बेड बनाउने कारखाना र अर्को केक बनाउने स्थलमा छापा मारिएको थियो । पक्राउ परेकामध्ये ४ जनालाई बेलायतबाट देशनिकालाको प्रकृया चलुन्जेल हिरासतमा राखिएको छ भने बाँकी आठलाई शर्तसहित जमानतमा रिहा गरिएको छ ।

गैरकानूनी आप्रवासन विरुद्ध मन्त्री माइकल टमलिन्सनले गैरकानूनी रुपमा कामदारहरूलाई काममा राखेमा व्यवसायहरू सजायको भागिदार हुने बताएका छन् । कागजपत्रविहिन आप्रवासीहरूलाई काममा लगाउने रोजगारदाताहरूलाई तीन गुणा जरिवाना गर्ने उनले बताएका थिए ।

कागजपत्रविहिनलाई काममा लगाएर पहिलोपटक नियमको उल्लंघन गर्ने व्यवसायलाई लगाइने जरिवाना १५ हजार पाउण्डबाट बढाएर ४५ हजार पाउण्ड बनाइएको छ । तीनबर्षभित्र दोश्रोपटक उल्लंघन गर्ने व्यवसायलाई ६० हजार डलर जरिवाना हुनसक्नेछ । यो उक्त कारखानामा ६ महिनाको अवधिमा तेश्रो छापा भएकाले व्यवसायले प्रत्येक कामदारको ६० हजार पाउण्डका दरले जरिवानाको सामना गर्नेछ ।

उक्त स्थानमा यसभन्दा अगाडि अक्टोबर र नोभेम्बरको छापामा ३० जना पक्राउ परेका थिए । त्यीबेला प्रतिव्यक्ति १५ हजार पाउण्डमात्र जरिवानाको नियम थियो भने व्यवसायलाई उक्त जरिवाना तिराइएको थियो । तर गत फेब्रअरीमा सरकारले जरिवाना तीनगुणा बढाएकाले अब उक्त व्यवसायले तिर्ने जरिवाना निकै चर्को हुने भएको छ ।

लेखक खसोखास अमेरिका ब्यूरो

Khasokhas Weekly is published Weekly and read by thousands of Nepalese and Nepalese speaking in the USA. There are more than 250,000 (unofficial data) Nepali people in the USA. According to the 2010 US Census, there are 59,490 Nepalese in the USA. The actual numbers…

यस लेखकका थप समाचार →