पेन्सिलभेनियामा सौतेनी आमा, बहिनी र पत्नीको हत्यापछि कारज्याक गरेर बन्दुकधारी हिराशतमा
प्रकाशित मिति : चैत्र ३, २०८० शनिबार
शनिबार बिहान पेन्सिलभेनियाको फल्स टाउनशिपमा तीन महिलाको हत्या गरेपछि भागेको बन्दुकधारीलाई प्रहरीले नियन्त्रणमा लिएको छ । उक्त व्यक्तिलाई हिराशतमा लिइएको र कोही पनि घाइते नभएको प्रहरीले जनाएको छ ।
संदिग्ध बन्दुकधारी सुरुमा न्युजर्सीको घर भित्र लुकेको विश्वास गरिएको थियो । जसका कारण प्रहरीले उक्त क्षेत्र घेरा हालेको थियो । तर घेरा हाल्नु अगाडि नै बन्दुधकारी त्यहाँबाट भागेको पछिमात्र थाहा भएको थियो । संदिग्ध व्यक्ति वास्तवमा न्यूयोर्क एभिन्यूमा हिंडिरहेको फेला पारेपछि हिरासतमा लिइएको छ ।
दुई फरक घरमा तीन जनाको हत्या पछि संदिग्ध २६ वर्षीय आन्द्रे गोर्डन कारज्याक गरेर न्युजर्सीको ट्रेन्टनमा आएको अधिकारीहरुले बताएका छन् । लेभिटाउनको भ्यूपोइन्ट लेनमा बिहान ९ बजेतिर गोर्डनले घरमा बस्ने दुई महिलालाई गोली हानेर हत्या गरेको अधिकारीहरुले बताएका छन् । ती दुई महिलाहरु गोर्डनकी ५२ बर्षकी सौतेनी आमा र १३ बर्षकी गोर्डनकी बहिनी भएको जनाइएको छ ।
गोर्डनले त्यसपछि एजवुड लेनमा रहेको घरमा गएर २५ वर्षीया टेलर डेनियललाई गोली हानेर हत्या गरेको जनाइएको छ । ती महिला गोर्डनका २ बच्चाकी आमा भएको जनाइएको छ । उक्त घरमा चार अन्य व्यक्ति घर भित्र थिए । गोर्डनले एउटी महिलालाई राइफले कुटपिट गरी घाइते बनाएको र उनलाई उपचारका लागि जेफरसन टोरेस्डेल अस्पतालमा लगिएको जनाईएको छ ।
त्यसपछि गोर्डनले ९ बजेर १३ मिनेटमा मोरिसभिलको ब्रिस्टल पाइकमा स्टोरको पार्किङमा चालकलाई बन्दुक देखाएर कारज्याक गरेको प्रहरीले बताएको छ। प्रहरीका अनुसार चालकलाई कुनै चोटपटक लागेको छैन ।
गोलीकाण्डपछि सेन्ट प्याट्रिक डे परेड रद्द गरिएको थियो भने बच्चाहरूको थिम पार्क बन्द गरिएको थियो । बक्स काउन्टीका अधिकारीहरूले त्यसक्षेत्रका बासिन्दाहरूलाई उनीहरूको घरमा बस्न र ढोका बन्द गर्न चेतावनी दिएका थिए ।