दूग्ध उत्पादक किसान र सरकारबिच सहमति , चैत्र २१ सम्म किसानले भुक्तानी पाउने
प्रकाशित मिति : फाल्गुन १९, २०८० शनिबार
दूग्ध उत्पादक किसानहरुले आन्दोलन स्थगित गरेका छन । सरकार संग पाँच बुदे सहमति भएपछि आन्दोलन स्थगित गरिएको दुग्ध सहकारी संघका केन्द्रीय अध्यक्ष अमरबहादुर कुँवरले जानकारी दिनुभयो । दूग्ध उत्पादक किसान र सरकारका बिचमा शनिबार बेलुका सहमति भएको हो ।
कृषि तथा पशुपक्षी विकासमन्त्री डा बेदुराम भुसालको उपस्थितिमा भएको वार्तामा दूध बिक्री गरेबापत किसानले पाउने रकमको भुक्तानी हरेक उद्योगीले आउँदो चैत २१ सम्म गरिसक्नेलगायतका पाँच बुँदे सहमति भएको हो ।
केन्द्रीय अध्यक्ष अमरबहादुर कुँवरका अनुसार निर्यात प्रवर्द्धनका लागि आगामी आर्थिक वर्षको नीति तथा कार्यक्रममा समावेश गर्ने, पशुपालक किसानलाई सरकारले दिँदै आएको बीमा कार्यक्रमलाई निरन्तरता दिने,उद्योगले सहकारीबाट खरिद गरेको दूधको परिमाणलाई नघटाइ मिल्क होलिडे नहुने गरी दूध खरिद गर्ने उद्योगीको दूध तथा दुग्धजन्य पदार्थ निर्यातका लागि कृषि तथा पशुपक्षी मन्त्रालयले समन्वय गर्ने र केन्द्रीय दुग्ध सहकारी सङ्घले राखेका माग सम्बोधनका लागि पहल गर्ने सहमति भएको हो ।
वार्तामा कृषि तथा पशुपक्षी विकास मन्त्रालयका सचिव डा रेवतीरमण पौडेल र केन्द्रीय दुग्ध सहकारी सङ्घका अध्यक्ष अमरबहादुर कुँवरलगायतको सहभागिता रहेको थियो । झण्डै ६ अर्ब रुपैयाँ दूधको भुक्तानी रोकिएको भन्दै किसान तथा सङ्घ सङ्गठनले गएको फागुन १० गते चरणबद्ध आन्दोलनका कार्यक्रम घोषणा गरी विरोध प्रदर्शन गर्दै आएका थिए ।