थोरै घट्यो ग्रिनकार्डवाहक र अमेरिकी नागरिकले नेपालबाट परिवार ल्याउन लाग्ने अवधि
प्रकाशित मिति : मंसिर २८, २०८० बिहीबार
अमेरिकी सरकारको विदेश मन्त्रालय ब्यूरो अफ कन्सुरल अफेयर्सले जारी गरेको जनवरीको भिसा बुलेटिन अनुशार ग्रिनकार्डवाहक र अमेरिकी नागरिकले नेपालबाट परिवार ल्याउन लाग्ने अवधि थोरै घटेको छ । अर्थात् उनीहरुका अनुहारमा थोरै मुस्कान ल्याएको छ ।
परिवारमा आधारित ग्रिनकार्डमा डिसेम्बरको तुलनामा फाइलिङ मितिमा फेरबदल नभए पनि र भिसा अप्वाइन्टमेन्ट पाउने मितिमा भने थोरै फेरबदल भएको छ । जसले गर्दा विदेशमा हुने परिवारका सदस्यहरुले केही छिटो ग्रिनकार्ड वा आप्रवासी भिसा पाउन सक्नेछन् । परिवारमा आधारित कुनै पनि श्रेणीको ग्रिनकार्ड जनवरीमा पनि करेन्ट नहुने भएको छ । युएससीआईएसले पनि सोही फाइलिङ मितिलाई नै आधार मानेकाले कुनै पनि श्रेणीमा अमेरिकामा हुनेले आई १३० आवेदनका साथमा ग्रिनकार्ड आवेदन आई ४८५ फाइल गर्न पाइने छैन ।
जनवरीमा ग्रिनकार्डवाहकका दम्पत्ति र २१ बर्ष नपुगेका छोराछोरीहरुका लागि अमेरिकाबाहिर हुनेहरुका सन्दर्भमा १ नोभेम्बर २०१९ भन्दा अगाडि प्राथमिकता मिति हुनेहरुले दूतावासमा भिसाका लागि अन्तरवार्ताको अप्वाइन्टमेन्ट पाउन सक्नेछन् । जुन गत महिनाको तुलनामा ८ महिना छिटो हो ।
अमेरिकी नागरिकका अविवाहित छोराछोरीहरुले ग्रिनकार्ड पाउनका लागि लाग्ने अवधि भने १ महिना बढेर ९ बर्ष पुगेको छ । भिसाको अप्वाइन्टमेन्ट पाउन भने आवेदनको प्राथमिकता मिति १ जनवरी २०१५ भन्दा अगाडिको हुनुपर्छ । योभन्दा अगाडि प्राथमिकता मिति भएकाहरुलेमात्र जनवरीमा भिसा अप्वाइन्टमेन्ट पाउनसक्छन् ।
ग्रिनकार्डवाहकका २१ बर्ष नाघेका अविवाहित छोराछोरीका लागि ग्रिनकार्ड पाउने लाग्ने अवधि एकहप्ता घटेको छ । भिसाको अप्वाइन्टमेन्ट पाउन आवेदनको प्राथमिकता मिति १ अक्टोबर २०१५ भन्दा अगाडिको हुनुपर्छ । अमेरिकाबाहिर हुनेहरुका सन्दर्भमा उल्लेखित मितिभन्दा अगाडि प्राथमिकता मिति भएकाहरुलेमात्र डिसेम्बरमा भिसाका लागि दूतावासमा अन्तरवार्ता अप्वाइन्टमेन्ट प्राप्त गर्न सक्नेछन् ।
अमेरिकी नागरिकका विवाहित छोराछोरीका लागि पनि ग्रिनकार्ड पाउने लाग्ने अवधि झण्डै ३ महिना घटेको छ । भिसाको अप्वाइन्टमेन्ट पाउन भने आवेदनको प्राथमिकता मिति २२ अप्रिल २००९ भन्दा अगाडिको हुनुपर्छ ।
अमेरिकी नागरिकका दाजुभाई दिदीबहिनीहरुका लागि ग्रिनकार्ड पाउन लाग्ने अवधि पनि एक महिना घटेको छ । जनवरीमा भिसाको अप्वाइन्टमेन्ट पाउन आवेदनको प्राथमिकता मिति २२ मे २००७ भन्दा अगाडिको हुनुपर्छ ।