२ सय बढी गीतपछि अमेरिका पुगेका बिमलेशको कमब्याक, केकीसँगै लिएर आए ‘अन्तिमपत्र’
झण्डै साढे २ सय म्युजिक भिडियोमा अभिनय गरिसकेका कलाकार बिमलेश अधिकारी नयाँ भिडियोमा देखिएका छन् । उनी कलाकार केकी अधिकारीसँगै अन्तिम पत्र गीतको भिडियोमा देखिएका हुन् । केकी अधिकारी र बिमलेश अधिकारीको जोडी विगतमा म्युजिक भिडियोमा निकै रुचाइएको जोडी हो ।
दिलिप घिमिरेको शब्द र बिरेन रसाइलीको स्वर रहेको उक्त गीतको भिडियोलाई बिमलेशले नेपाली म्युजिक भिडियोमा आफ्नो कमब्याक भनेका छन् । आगामी दिनमा अन्य म्युजिक भिडियोको पनि तयारी भइरहेको उनले बताए । अमेरिकाको मेरिल्याण्ड निवासी बिमलेश हाल नेपालमा छन् ।
गतबर्ष उनी झण्डै ५ बर्षपछि मूलधारको म्युजिक भिडियोमा देखिएका थिए । आमाबाट विछोडिएर घरबाट टाढा पुगेपछि मानसिक पीडा भोगिरहेको छोराको मनोदशामा बनेको म्युजिक भिडियो एउटा यस्तो मूर्तिमा बिमलेशले अभिनय गरेका थिए ।
६ वटा चलचित्र र दुईवटा टेलिसिरियलमा समेत अभिनय गरेका बिमलेश केही समयदेखि मूलधारको रंगमञ्चमा थिएनन् । यद्यपी उनले अमेरिकामा केही म्युजिक भिडियोको निर्देशन र अभिनय भने गरेका थिए । क्या दामी भो, तिर्खा लाग्यो पानी खाएँ, धेरैपल्ट मरें म त, अलिकति नजर तिम्रो जस्ता सुपरहिट गीतहरुका म्युजिक भिडियोमा बिमलेशले अभिनय गरेका थिए ।
हालै उनको टक शो बोल्ड टक वीथ बिमको ९ वटा भाग युट्युबबाट प्रशारण भएको थियो भने उनले नेपालको टेलिभिजनमा उक्त टक शोको नयाँ सिजन सुरु गर्ने योजना समेत बनाएका छन् । पहिलो सिजनमा अमेरिकामा रहेका कलाकार र अन्य व्यक्तित्वहरुलाई समेटिएको थियो ।
बिमलेश १६० बर्ष पुरानो अमेरिकाको चर्चित ब्राण्डेड स्टोर मेसिजका स्टायल एम्बासडर समेत थिए । स्टायल एम्बेसडरका रुपमा उनले मेसिजमा बिक्रि हुने ब्राण्डहरुको प्रवद्र्धन गरेका थिए । मेसिजले आफ्ना प्रचारप्रसारमा समेत स्टायल एम्बेसडरका रुपमा बिमलेसलाई फिचर गरेको थियो ।
