देशभरमै धेरै मतान्तरले चुनाव जित्ने रवि लामिछाने, कम अन्तरले जित्ने बसन्तकुमार नेम्वाङ
प्रकाशित मिति : मंसिर १३, २०७९ मंगलबार
प्रतिनिधिसभा निर्वाचनमा राष्ट्रिय स्वतन्त्र पार्टीका सभापति रवि लामिछानेले सबैभन्दा धेरै अर्थात् ३४ हजार ३१२ मतको अन्तरले चुनाव जितेका छन् । उनले चितवन २ मा सत्ता गठबन्धनबाट उम्मेदवार नेपाली कांग्रेसका केन्द्रीय सदस्य एवम् राज्यमन्त्री उमेश श्रेष्ठलाई भारी मतान्तरसहित पराजित गरे ।
यो क्षेत्रमा कुल ८४ हजार ३१५ मत खसेको थियो । त्यसमध्ये लामिछानेले ४९ हजार ३०० अर्थात् ५८ दशमलव ४७ प्रतिशत मत ल्याएर जिते । उनका निकटतम प्रतिद्वन्द्वी श्रेष्ठले १४ हजार ९८८ मत ल्याए ।
कम मतान्तरले चुनाव जित्नेमा भने पााचथरका बसन्तकुमार नेम्वाङ हुन् । यद्यपी निर्वाचन आयोगले पाँचथरको अन्तिम नतिजा घोषणा गरेको भने छैन । तर प्रत्यक्षतर्फको मतपेटिका गणना भइसक्दा नेपाली कांग्रेसका सहमहामन्त्री भीष्मराज आङ्देम्बे ४७ मतले पराजित भएका छन् ।
प्रत्यक्षतर्फको पेटिका गणनाको अन्तिम परिणामअनुसार नेम्वाङले ३२ हजार ११० मत पाएका छन् भने आङ्देम्बेले ३२ हजार ६३ मत पाएका छन् ।