अल्फाबिटामा बालेनको एक्सन : बिहान सञ्चालकसँग झोक्किए, दिउँसो डोजर चलाए (भिडियो)
प्रकाशित मिति : भाद्र ९, २०७९ बिहीबार
काठमाडौंको नयाँ बानेश्वरस्थित अल्फाबिटा कम्प्लेसले अवैध रुपमा बनाएको संरचनामा काठमाडौं महानगरपालिकाले डोजर चलाएको छ । आज बिहान मात्रै अल्फाबिटा पुगेर अवैध संरचना तत्काल हटाउन निर्देशन दिएका मेयर बालेन शाहले दिउँसो पुनः पुगेर डोजर चलाएका हुन् ।
बिहान अवैध संरचना हटाउन निर्देशन दिँदै गर्दा मेयर बालेन शाह र कम्प्लेसका सञ्चालक द्विराज शर्माबीच सवाल जवाफ भएको थियो । सञ्चालक शर्माले आफूले व्यवसाय गर्न स्वीकृत लिएको बताउँदै गर्दा शाहले आक्रोशित शैलीमा ३५ दिने सूचना हातमा देखाउँदै ‘तपाईंको घरको नक्सा मसँग हुनुपर्ने कि तपाईंसँग’ भन्दै चर्को स्वरमा झोक्किन पुगेका थिए ।
महानगरको कर्मचारी, नगर प्रहरी र ट्राफिक प्रहरीको टोलीसहित निस्किएका शाहले बिहीबार मात्रै शंखमूलस्थित एक व्यावसायिक भवनको पार्किङमा बेसमेन्टमा बर्गर हाउस सञ्चालन गरेको पाएपछि त्यहाँ पुगेर हटाउन निर्देशन दिए । त्यहाँपश्चात महानगरप्रहरी र कर्मचारीको टोली बत्तिसपुतलि स्थित मुक्तिनाथ विकास बैंक र आडमा रहेको एक रेष्ट्ररेन्टलाई समेत अवैध संरचना हटाउन निर्देशन दिएको थियो ।
बुधबार मात्रै बालेन्द्र शाहले सुन्धारास्थित काठमाडौं मलअगाडि रहेका अवैध संरचना र खिचापोखरी नजिकैको आरबी कम्प्लेक्स पुगेको संचरना पनि भत्काएका छन् । काठमाडौं महानगरपालिकाले अवैध संरचना हटाउने कार्यलाई तीव्रता दिएको छ । अनधिकृत संरचना हटाउन काठमाडौंका मेयर बालेन्द्र शाह स्वंय नै बानेश्वर क्षेत्रमा खटिएका छन् । यसअघि ३५ दिने सूचना निकाल्दा पनि अटेरी गरेपछि मेयर शाहले अवैध संरचना भत्काउने अभियान चलाएका हुन् ।
भिडियो :