एसाइलम स्वीकृतमा आधारित ८०% ग्रिनकार्ड आवेदनमा निर्णय आउन ४० महिनासम्म
प्रकाशित मिति : भाद्र ५, २०७९ आईतबार
युएससीआईएसको पछिल्लो विवरण अनुशार एसाइलम स्वीकृतमा आधारित ग्रिनकार्ड आवेदनमा निर्णय आउन औषतमा ४० महिना लाग्ने गरेको छ । एसाइलम स्वीकृत भएको एकबर्षपछि ग्रिनकार्ड आवेदन दिन सकिने प्रावधान रहेकोमा ग्रिनकार्ड आवेदन दिइसकेपछि यसबारे निर्णय आउन यो अवधि लाग्ने गरेको हो ।
एसाइलम स्वीकृत भएको आधारमा २०१८ को नोभेम्बरमा ग्रिनकार्ड आवेदन दिएकाहरुले अहिलेसम्म पनि आवेदनबारे निर्णय प्राप्त नगरेको खण्डमा आगामी सेप्टेम्बरमा आफ्नो आवेदनबारे युएससीआईएसमा सोधपुछ गर्न सक्नेछन् । अर्थात् युएससीआईएसमा आफ्नो आवेदनबारे सोधपुछका लागि आवेदन दिएको मितिले झण्डै ४६ महिना कुर्नुपर्ने अवस्था आएको छ ।
एसाइलम स्वीकृत भएको आधारम दिइएको ग्रिनकार्ड आवेदन नेब्रास्का सर्भिस सेन्टर र टेक्सास सर्भिस सेन्टरले प्रकृयामा लैजादै आएको छ । दुबै सर्भिस सेन्टरमा ८० प्रतिशत आवेदनबारे ४० महिनाभित्र निर्णय आउने गरेको छ । जसको अर्थ कतिपय आवेदनमा निर्णय प्राप्त गर्न भने ४० महिना नलाग्न पनि सक्छ । तर २० प्रतिशत आवेदनमा निर्णय आउन त्योभन्दा पनि बढी समय लाग्नसक्छ ।
ग्रिनकार्ड आवेदन आई ४८५ स्वीकृत भएको मितिले एकबर्ष अगाडिदेखिमात्र स्थायी बासिन्दाको मान्यता दिइने प्रावधानका कारण एसाइलमबाट ग्रिनकार्ड प्राप्त गर्नेहरु अमेरिकी नागरिकता आवेदन दिने सन्दर्भमा अन्यौलमा पर्ने गरेका छन् । एसाइलममा आधारित आई ४८४ आवेदन स्वीकृत भएको ३ बर्ष ९ महिना पूरा भएका ग्रिनकार्डवाहकले अमेरिकी नागरिकताका लागि आवेदन दिनसक्ने प्रावधान रहेको छ ।
एसाइलम आवेदनको रिसिप्ट आउन पनि ढिलाई
एसाइलम आवेदनको रिसिप्ट आउन नियमित भन्दा केही ढिलो भएपनि नआत्तिन युएससीआईएसले सुझाव दिएको छ । एसाइलम आवेदन आई ५८९ को रिसिप्ट पठाउन केही ढिलो भइरहेको युएससीआईएसले प्रष्ट पारेको छ ।
उक्त ढिलाई कारण आवेदकले समयमै रिसिप्ट प्राप्त नगर्नसक्ने भएपनि आवेदन प्राप्त गरेको मितिबाटै प्राथमिकता मिति गणना गरिने युएससीआईएसले जनाएको छ । अमेरिका आएको एकबर्षभित्रै एसाइलम फाइल गर्नुपर्ने प्रावधान, एसाइलम अन्तरवार्ताका लागि प्राथमिकता र पेन्डिङ एसाइलमका आधारमा वर्क परमिट प्राप्त गर्ने मितिको गणना पनि युएससीआईएसले आवेदन प्रकृयामा लगेको मितिबाट नभई प्राप्त गरेको मितिबाटै हुने युएससीआईएसले स्पष्ट पारेको छ ।
सही तरिकाले फाइल नगरिएका आवेदनका सन्दर्भमा भने त्यस्ता आवेदनहरु अस्वीकृत गरेर फाइल गर्नमा भएको कमजोरीबारे आवेदकलाई सुचित गरिने युएससीआईएसको भनाई छ । समयमा नै रिसिप्ट प्राप्त नगरेको खण्डमा अरु एसाइलम आवेदन आई ५८९ नपठाउन सुझाव दिइएको छ । यदि त्यसो गरेमा आवदेनमा ढिलाई हुने युएससीआईएसले जनाएको छ ।
आवेदन सही तरिकाले फाइल गर्नका लागि युएससीआईएसले केही सुझावहरु पनि दिएको छ । अवस्थामा परिवर्तन आएको वा कुनै असाधारण अवस्थाले गर्दा अमेरिका आएको एकबर्षभित्र आवेदन दिन नसकेको बाहेक अन्य अवस्थामा अमेरिका आएको एकबर्षभित्रै आवेदन दिन सुझाव दिइएको छ ।
त्यस्तै आवेदनमा सबै प्रश्नको जवाफ कालो मसीले लेख्न सुझाव दिइएको छ । फर्ममा आवेदक र उसको परिवारको बारेमा सोधिएका सबै जानकारीहरु उपलब्ध गराउन तथा लागु नहुने सन्दर्भमा नन, नट एप्लीकेबल वा अननोन लेख्न सुझाव दिइएको छ । आवेदनका साथमा आफ्नो एसाइलमको लिखित विवरण पठाउन तथा उक्त विवरणमा आफूले भोगेका घटना, मिति र अनुभव लगायत समावेश गर्न प्रोत्साहन गरिएको छ ।
पुरक कागजात लगायतका कागजातमा एलियन नम्बर भएको खण्डमा उक्त नम्बर, नाम, मिति र हस्ताक्षर गरेर पठाउन सुझाव दिइएको छ । एसाइलमको आवेदन भर्मोन्ट सर्भिस सेन्टरमा नपठाउन र उक्त सेन्टरले एसाइलम आवेदन प्रकृयामा नलगेकाले त्यहाँ आवेदन पठाएको खण्डमा थप ढिलाइ हुने प्रष्ट पारिएको छ ।