एरिक आडम्सले न्युयोर्कको टाइम्स स्क्वायरमा मध्यरातमा मेयरको सपथग्रहण गर्ने
प्रकाशित मिति : पुस १४, २०७८ बुधबार
न्युयोर्कका नवनिर्वाचित मेयर एरिक आडम्सले नयाँबर्षमा न्युयोर्कको टाइम्स स्क्वायरमा मध्यरात लगत्तै सपथग्रहण गर्ने भएका छन् । टाइम्स स्क्वायरमा बल खसालेपछि नयाँ बर्ष सुरु हुने बित्तिकै उनले न्युयोर्क सिटीको ११० औं मेयरका रुपमा सपथग्रहण गर्ने भएका छन् ।
सिटी क्लर्कमार्फत उनले सपथग्रहण गर्नेछन् भने सपथग्रहणमा उनले आफ्नो परिवारको बाइबललाई साक्षी राख्नेछन् । नयाँ चुनौतिको सामना गर्दै आफू न्युयोर्क सिटीको नेतृत्व गर्न तयार रहेको मेयर आडम्सले बताएका छन् ।
एरिक आडम्सको पदभार ग्रहण समारोहक सुरुमा जनवरीका १ का लागि तय भएको थियो । तर कोरोना संक्रमण बढेपछि उक्त समारोह स्थगित गरिएको थियो । पदभार ग्रहणको कुनै विशेष समारोहविना नै आफू न्युयोर्क सिटीको नेतृत्व गर्न तयार रहेको आडम्सले बताएका थिए ।
सपथग्रहण पछि आडम्स न्युयोर्क सिटीमा दोश्रो अश्वेत मेयर हुनेछन् । उनी सन् २०१४ देखि न्युयोर्क सिटीको ब्रुकलिन बोरो प्रेसिडेण्ट रहदै आएका थिए । शनिबारदेखि ६१ बर्षका आडम्सले वर्तमान मेयर बिल ब्लाजिओको स्थान लिनेछन् ।
गरिबीबाट उठेर प्रहरी क्याप्टेनहुँदै बु्रकलिन बोरो पे्रसिडेण्ट भएका एरिक आडम्स समक्ष कोरोना महामारीबाट क्षतिग्रस्त न्युयोर्क सिटीलाई पुनजीर्वित पार्ने तथा सिटीभित्रको सामाजिकआर्थिक तथा विभेदपूर्ण असमानतालाई सम्बोधन गर्नुपर्ने दायीत्व रहेको छ ।
पछिल्लो चरणमा न्युयोर्क सिटीभित्र बढेका गोलीकाण्ड र अपराधका घटनाले गर्दा न्युयोर्क सिटीलाई सुरक्षित बनाउनुपर्ने दायीत्व अझै धेरै बढेको छ । कानून कार्यान्वयन पृष्ठभूमिका एरिक आडम्सले शान्ति सुरक्षा कायम गर्ने सन्दर्भको एजेण्डामा न्युयोर्कबासीको मन जित्न सफल भएका थिए ।
एरिक आडम्स न्युयोर्कमा रहेका नेपालीमाझ समेत लोकप्रिय रहेका छन् । उनलाई नेपाली समुदायका तर्फबाट इन्डोर्स समेत गरिएको थियो ।साथै नेपाली समुदायले समेत उनलाई चुनावी अभियानका क्रममा फण्डरेजमा सहयोग गरेका थिए ।
आडम्सले कोरोना महामारीमा न्युयोर्कको नेपाली समुदायलाई उल्लेख्य सहयोग समेत गरेका थिए । साथै कोरोना महामारीमा अग्रपंक्तिमा रहेर योगदान दिने नेपाली समुदायका विभिन्न व्यक्तित्वहरुलाई सम्मान समेत गरेका थिए । नेपाली समुदायले आयोजना गर्ने विभिन्न कार्यक्रममा सहभागी हुदै आएका आडम्स न्युयोर्कको नेपाली समुदायको पहिलो छनौट रहेका थिए ।