सन् २०२२ देखि युरोपको शेंगेन क्षेत्र जाँदा अमेरिकनले समेत शुल्कसहित अनलाइन आवेदन दिनुपर्ने
प्रकाशित मिति : मंसिर २, २०७८ बिहीबार
अमेरिकी पासपोर्ट
सन् २०२२ देखि युरोपको शेंगेन क्षेत्र जाँदा अमेरिकन पासपोर्ट हुनेहरुले समेत शुल्कसहित आवेदन दिनुपर्ने भएको छ । शेंगेन क्षेत्रका २६ देशहरुमा जाँदा अमेरिका, अष्ट्रेलिया, ईंग्ल्याण्ड लगायतका देशका नागरिकहरुले समेत नयाँ आवेदन भर्नुपर्ने र ७ युरो शुल्क तिर्नुपर्ने जनाइएको छ ।
अमेरिका, अष्ट्रेलिया, ईंग्ल्याण्ड लगायतका देशको पासपोर्ट हुनेहरुलाई शेंगेन क्षेत्र प्रवेश गर्दा अगाडि नै भिसा लिनु नपर्ने भएपनि नयाँ अनलाइन फर्मभने भर्नुपर्नेछ । नयाँ अनलाइन फर्म भर्न १० मिनेटभन्दा पनि छोटो समय लाग्नेछ भने अधिकांश आवेदकले आवेदन पेश गरेको केही मिनेटमा नै स्वीकृति प्राप्त गर्नेछन् ।
त्यसपछि उनीहरु हरेक ६ महिनाको अवधिमा ९० दिनसम्म युरोपको शेंगेन क्षेत्रमा रहन सक्नेछन् । ९० दिनभन्दा लामो समय बस्न चाहनेहरुले भने दूतावास वा कन्सुलेटबाट भिसा लिनुपर्नेछ । फर्म भर्नका लागि आवेदकले बायोमेट्रिक पासपोर्ट जानकारी लगायतका व्यक्तिगत विवरणहरु हाल्नुपर्नेछ । १८ बर्षभन्दा कम उमेरका र ७० बर्षभन्दामाथिकाले भने यस्तो फर्म भर्नु पर्नेछैन ।
बारम्बार युरोपियन युनियनका देशहरुमा भ्रमण गर्नेहरुले पनि युरोपको हरेक यात्रामा फर्म भर्नुपर्ने छैन । एकपटक आवेदन दिइसकेपछि ३ बर्षसम्म काम गर्नेछ भने ३ बर्ष नाघिसकेपछि नविकरण गर्न आवश्यक हुनेछ । युरोपियन आयोगले स्वीकृत गरेको युरोपियन ट्राभल इन्फर्मेशन एण्ड अथोराइजेशन सिस्टम अन्तरगत यो प्रावधान लागु गर्न लागिएको हो ।
यो प्रणाली अमेरिकाको भिसा छुट प्रणाली इस्टासँग मिल्दोजुल्दो रहेको छ । अमेरिकामा पनि भिसा छुटप्राप्त देशका नागरिकहरुले इलेक्ट्रोनिक सिस्टम फर ट्राभल अथोराइजेशन इस्टामा दर्ता गर्नुपर्छ । शेंगेन क्षेत्रमा प्रवेश गर्न एसिया, अफ्रिका र दक्षिण अमेरिकाका देशबाट आउनेहरुले भिसा लिनुपर्ने भएकाले भिसा लिएर आउनेहरुले यस्तो फर्म भर्न आवश्यक हुनेछैन ।