अमेरिकाको अन अराइभल भिसाको सुचीमा नयाँ देश थपिदै, नेपाल किन योग्य छैन ?
प्रकाशित मिति : आश्विन १३, २०७८ बुधबार
अमेरिकाले अन अराइभल भिसाको सुचीमा नयाँ देश थप्न लागेको छ । भिसा वेभर कार्यक्रम अन्तरगत भिजिटर भिसाका लागि अमेरिकाले बेलाबेलामा देशहरुको सुची पुनरावलोकन गर्दै आएको छ । जस अन्तरगत क्रोएसियालाई थप्न लागेको हो ।
क्रोएसियाका नागरिकहरु डिसेम्बरको ढिलोमा पहिलोसाताबाटै भिसा वेभर कार्यक्रमका लागि योग्य हुने भएका छन् । अमेरिकाको भिसा वेभर कार्यक्रमका लागि योग्य हुने देशमा क्रोएसिया ३९ देश भएको छ ।
भिसा वेभरका लागि योग्य देशका नागरिकले अमेरिकाको इलेक्ट्रोनिक सिस्टम फर ट्राभल अथोराइजेनश इस्टामार्फत अमेरिका प्रवेश गर्नुभन्दा ७२ घण्टा अगाडिसम्म आवेदन दिनसक्छन् । उनीहरुले दूतावास वा कन्सुलेटबाट भिसा लिन आवश्यक हुँदैन । उनीहरुले ९० दिनसम्मको भिजिटर भिसा बी प्राप्त गर्न सक्नेछन् ।
नेपाल भने भिसा वेभर कार्यक्रमका मापदण्डहरु पूरा गर्न नसकेका कारण अमेरिकाको अन अराइभल भिसाका लागि अयोग्य भएको हो । यो कार्यक्रमका लागि योग्य हुन अमेरिकन नागरिकका लागि पनि समान प्रकारको भिसा वेभरको सुविधा दिइएको हुनुपर्छ भने दूतावास वा कन्सुलेटमा भिसा आवेदन दिंदा भिसा अस्वीकृत दर ३ प्रतिशतभन्दा कम हुनुपर्छ । नेपालीको भिसा अस्वीकृत दर ५० प्रतिशतको हाराहारीमा छ ।
पासपोर्ट चोरी भएको वा हराएको रिपोर्ट २४ घण्टाभित्र इन्टरपोलमार्फत अमेरिकालाई दिनुपर्ने, मेसिन रिडेबल पासपोर्ट लागु गरेको हुनुपर्ने लगायतका ८ वटा मापदण्ड पूरा गरेका मुलुकमात्र अमेरिकाको भिसा वेभर कार्यक्रमका लागि योग्य हुन्छन् । नेपाल भिसा वेभर कार्यक्रमका लागि अयोग्य हुनुको मुख्य कारण अमेरिकाले नेपालीलाई भिसा अस्वीकृत गर्नेदर अत्याधिक हुनु हो ।
नेपालीको भिसा अस्वीकृत दर कस्तो छ ?
आर्थिक बर्ष २०२० मा आवेदकमध्ये झण्डै ५१ दशमलव ९ प्रतिशत नेपालीहरुलाई अमेरिकाले भिजिटर भिसा प्रदान गरेको छ । विगत तीनवर्षको अवधिमा सन् २०२० मा अमेरिकाको भिजिटर भिसा स्वीकृत हुने नेपालीहरुको प्रतिशत दर सबैभन्दा उच्च हो ।
आर्थिक बर्ष २०२० मा झण्डै १५ हजार नेपालीहरुले अमेरिकाको भिजिटर भिसा आवेदन दिएका थिए । त्यसमध्ये ७ हजार ७ सय ५१ जनाको भिजिटर भिसा स्वीकृत भएको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । जसमा बी वानमात्र पाउनेहरु १३ जना, बी टु मात्र पाउनेहरु १ जना र बीवान बीटु भिसा पाउनेहरु ७ हजार ७ सय ३७ जना रहेका छन् ।
आवेदकमध्ये झण्डै ७ हजार २ सय नेपालीहरुको भिजिटर भिसा अस्वीकृत भएको तथ्यांकले देखाएको छ । २०२० मा कुल आवेदकहरुमध्ये ४८ दशमलव १ प्रतिशतको भिजिटर भिसा अस्वीकृत भएको थियो ।
नेपालीको भिजिटर भिसा अस्वीकृत दर आर्थिक बर्ष सन् २०१९ मा ५० दशमलव ७ प्रतिशत र २०१८ मा ५१ दशमलव ५ प्रतिशत रहेको थियो । आर्थिक बर्ष २०१७ मा भने अस्वीकृत दर ४६ दशमलव ४ प्रतिशतमात्र थियो ।
आर्थिक बर्ष २०१९ को तुलनामा भिसा पाउने प्रतिशत दर बढेपनि संख्या भने घटेको छ । २०१९ मा १७ हजार १ सय १४ नेपालीहरुलाई अमेरिकाको भिजिटिर भिसा प्राप्त गरेकोमा २०२० मा यो संख्या ६० प्रतिशतभन्दा धेरैले घटेको छ ।
आर्थिक बर्ष २०१८ मा भने नेपालीहरुको भिजिटर भिसा अस्वीकृत दर सन् २०१२ पछिकै सबैभन्दा धेरै रहेको थियो । सन् २०११ मा भने त्योभन्दा पनि धेरै कुल आवेदकमध्ये ५९ दशमलव ९ प्रतिशत नेपालीहरुको भिजिटर भिसा अस्वीकृत भएको थियो । सन् २००६ देखि सन् २०११ सम्म भिजिटर भिसाका कुल आवेदकमा भिसा पाउनेहरुभन्दा नपाउनेहरुकै प्रतिशतदर उच्च थियो ।
तर सन् २०१२ देखि २०१७ सम्म भिजिटर भिसाका कुल आवेदकमा भिसा पाउनेहरुको प्रतिशत नपाउनेहरुको तुलनामा बढी थियो । सन् २०१४ मा त कुल भिजिटर भिसाका नेपाली आवेदकहरुमध्ये ६१ दशमलव ८ प्रतिशतले भिसा पाएका थिए । कुल आवेदकमध्ये जम्मा ३८ दशमलव २ प्रतिशत नेपाली आवेदकको भिजिटर भिसा अस्वीकृत भएको थियो ।