नेपालमा कोरोनाबाट मृत्यु हुनेको संख्या १० हजार नाघ्यो, कहाँ कति मृत्यु?
प्रकाशित मिति : श्रावण २२, २०७८ शुक्रबार
नेपालमा कोरोना संक्रमणबाट मृत्यु हुनेको संख्या १० हजार नाघेको छ। स्वास्थ्य तथा जनसंख्या मन्त्रालयका अनुसार २४ घण्टामा २५ जनाको मृत्यु भएसँगै संक्रमणबाट मृत्यु हुनेको संख्या १० हजार १९ पुगेको हो।
प्रदेशगत हिसाबले सबैभन्दा धेरै मृत्यु बागमती प्रदेशमा भएको छ। यहाँ हालसम्म ४ हजार २ सय ७४ जनाको मृत्यु भएको छ। यस्तै, लुम्बिनीमा १ हजार ६ सय २२, प्रदेश १ मा १ हजार ४ सय ४, गण्डकीमा १ हजार १ सय १, प्रदेश २ मा ७ सय ७४, सुदूरपश्चिममा ४ सय ४६ र कर्णालीमा ४ सय २५ जनाको मृत्यु भएको छ।
काठमाडौं उपत्यकामा काठमाडौंमा १ हजार ९ सय ८०, भक्तपुरमा ३ सय ९६ र ललितपुरमा ६ सय जनाको मृत्यु भएको छ।
उमेरगत हिसाबले सबैभन्दा धेरै मृत्यु ६० वर्षभन्दा माथिको भएको छ। हालसम्म यो उमेर समूहका ५ हजार ३ सय ८७, ५० देखि ५० वर्षका १ हजार ९ सय ६१, ४० देखि ४९ वर्ष उमेरका १ हजार ४ सय ३७, ३० देखि ३० वर्ष उमेरका ८ सय २८, २० देखि २० वर्षका ३ सय ४, १० देखि १९ वर्षका ५० र ९ वर्षसम्मका ४५ जनाको कोरोनाका कारण मृत्यु भएको छ।
स्वास्थ्य मन्त्रालयको पछिल्लो तथ्यांक हेर्न तलकाे लिंकमा क्लिक गर्नुहोला
यस्तै, पछिल्लो २४ घण्टामा देशभर ३७२९ नयाँ संक्रमित थपिएका छन्। स्वास्थ्य तथा जनसंख्या मन्त्रालयका अनुसार ६१८२ जनामा एन्टिजेन र ९४९३ जनामा पिसिआर परीक्षण गर्दा उक्त संख्यामा संक्रमण पुष्टि भएको हो। उपत्यकामा काठमाडौंमा ४७१, ललितपुरमा १४७ र भक्तपुरमा ८३ संक्रमित थपिएका छन्।
त्यस्तै, १६६५ संक्रमित निको भई डिस्चार्ज भएका छन्। हाल देशभर ३४ हजार ९ सय ४२ संक्रिय संक्रमित रहेका छन्।