मंगलबार जोन्सन एण्ड जोन्सनको भ्याक्सिन वितरणमा अन्यौल, घण्टौं लाइनमा बसेकाहरु भ्याक्सिन नलगाई फिर्ता
(नोट: यो समाचार थप विवरणसहित अपडेट गरिएको छ । यस अगाढि स्वास्थ्य मन्त्रालयको भनाईलाई आधार मानेर मंगलबारदेखि जोन्सन एण्ड जोन्सन भ्याक्सिन वितरण सुरु भएको उल्लेख गरिएकोमा उक्त विवरण सच्याइएको छ ।)
सरकारले मंगलबारदेखि नै नेपालमा जोन्सन एण्ड जोन्सनको भ्याक्सिन वितरण सुरु गर्ने बताएपनि त्यसबारे मंगलबार अन्यौल कायम रह्यो । भ्याक्सिन वितरण केन्द्रहरुमा जोन्सन एण्ड जोन्सनको भ्याक्सिन लगाउन पुगेका कैयन सर्वसाधारण घण्टौं लाइन बसेर भ्याक्सिन नलगाई फर्कनुपरेको गुनासो गरेका छन् ।
स्वास्थ्य मन्त्रालय अन्तरगतको हेल्थ इमर्जेन्सी अपरेशन सेन्टर एचईओसी नेपाल प्रहरी अस्पताल काठमाडौंमा जोन्सन एण्ड जोन्सनको भ्याक्सिन लगाउन सुरु भइसकेको बताएपनि नेपाल प्रहरी अस्पतालले भने भेरोसेलमात्र लगाइएको पुष्टी गरेको थियो । शुक्रराज ट्रपिकल तथा सरुवा रोग अस्पताल टेकुमा पनि मंगलबार जोन्सन एण्ड जोन्सनको भ्याक्सिन वितरण हुने सुचना पाएका सर्वसाधारणहरु घण्टौं लाइन बसेर भ्याक्सिन नलगाई फर्के ।
मंगलबार बसेको बैठकले साउन ४ देखि ६ सम्म काठमाडौंका विभिन्न खोप केन्द्रहरुबाट जोन्सन एण्ड जोन्सन भ्याक्सिन वितरण गर्ने निर्णय गरिएको जिल्ला प्रशासन कार्यालय काठमाडौंले जानकारी दिएपछिमात्र अन्यौल हटेको छ । काठमाडौंमा अब तोकिएका खोपकेन्द्रहरुबाट असार २९ देखि साउन २ सम्म भेरोसेल र साउन ४ देखि ६ सम्म जोन्सन एण्ड जोन्सन भ्याक्सिन वितरण हुने भएको छ ।
भ्याक्सिन वितरणबारे थप जानकारीका लागि स्थानीय निकायहरुमा सम्पर्क गर्न सुझाव दिइएको छ । वडा कार्यालयहरुमार्फत पनि यस्तो जानकारी प्राप्त गर्न सकिनेछ । टोखा नगरपालिका अन्तरगत बुधबारदेखि ग्राण्डी अस्पताल र अल नेपाल अस्पतालमा भेरोसेल भ्याक्सिन लगाइने नगरपालिकाले जनाएको छ ।
जोन्सन एण्ड जोन्सन भ्याक्सिन ५० देखि ५४ वर्ष उमेरका व्यक्तिले लगाउन सक्नेछन् । तोकिएको उमेर समुह बाहेक जोन्सन एण्ड जोन्सन भ्याक्सिन लगाउन अशक्त र अपाङ्गता भएका व्यक्ति समेत योग्य रहेका छन् । त्यस्तै नेपालमा रहेका शरणार्थी, स्वास्थ्यकर्मी र सरसफाईकर्मीहरूलाई समेत यो भ्याक्सिन पाउन योग्य छन् ।
भ्याक्सिन लगाउनका लागि नागरिकले उमेर खुल्ने आधिकारिक प्रमाण नागरिकता, पासपोर्ट, सवारी चालक प्रमाणपत्र, शैक्षिक प्रमाणपत्र र सो नभएमा पालिका, वडाबाट उमेर प्रमाणित कागजात लिएर जानुपर्नेछ।
५५ बर्षभन्दा माथिकाहरुलाई भने चाइनिज भ्याक्सिन भेरोसेल प्रदान गरिदैछ । विश्वविद्यालय, विद्यालयका प्राध्यापक, शिक्षक र कर्मचारीहरु, सार्वजनिक यातायातमा कार्यरत चालक र सहचालक पनि भेरोसेल लगाउन योग्य रहेका छन् । नेपाल सरकारले तोकेका अत्यावश्यक सेवामा संलग्न खोप लगाउन बाँकी व्यक्तिहरु, खोप अनिवार्य गरेका देशमा जाने नेपाली नागरिकलाई पनि भेरोसेल लगाउन योग्य रहेका छन् ।
