नेपालबाट अमेरिका जान सकिने २ उडानबारे अमेरिकी दूतावासका ५ स्पष्टीकरण
प्रकाशित मिति : जेष्ठ १, २०७८ शनिबार
अमेरिकी दूतावास काठमाडौं
नेपालबाट मे १६ र १७ मा अमेरिका जान सकिने व्यवसायिक चार्टड उडानबारे अमेरिकी दूतावासले ५ स्पष्टीकरण दिएको छ । नेपालको सरकारले कतार र टर्किस एयरलाइन्सका दुईवटा चार्टड उडानहरु स्वीकृत गरेपछि धेरैले भाडा महँगो भएको र ट्राभल एजेन्सीहरुले समन्वय नगरेको गुनासो गरिरहँदा दूतावासले यी उडानहरुबारे थप स्पष्ट पारेको हो । दूतावासले आफूहरुसमक्ष सोधिएका मुख्य प्रश्नहरुको जवाफ दिएको हो ।
यी उडानबाट यात्रागगर्दा १५ सयदेखि १९ सयडलरसम्म भाडा तय गरिएको छ । यी उडानहरु अमेरिकी सरकारबाट चार्टड गरिएका, स्पोन्सर गरिएका वा फण्ड उपलब्ध गराइएका उडानहरु नरहेको दूतावासले स्पष्ट पारेको छ । यी उडानहरु निजी एयरलाइन्सबाट संचालित व्यवसायिक उडानहरु रहेको पनि दूतावासले स्पष्ट पारेको छ । टिकटदर तय गर्नमा र व्यक्तिको टिकट बुकिङ निर्धारणका सन्दर्भमा आफूहरुको कुनै भूमिका नरहेको दूतावासको भनाई छ ।
यी उडानहरुमा सिट पाउन नसकेका अमेरिकनहरुका लागि दूतावासले कहिले उद्दार उडान संचालन गर्ला ? यसबारे दूतावासले भनेको छ – ‘दूतावासको सबैभन्दा महत्त्वपूर्ण प्राथमिकता नेपालमा रहेका अमेरिकी नागरिकहरूलाई सहयोग गर्नु हो। त्यसैले हामी हाम्रो कूटनीतिक साझेदारहरुसँग नेपाल सरकारसँग नियमित व्यवसायिक उडानहरु सुचारु गर्नका लागि आग्रह गर्न सामेल हुन्छौं। अमेरिकी र अन्य नागरिकहरूको तत्काल यात्रा आवश्यकताहरू पूरा गर्ने यो उत्तम विकल्प हुनेछ।’
ती उडानहरु गैर अमेरिकी नागरिकले बुक गरिरहेको बेला किन दूतावासले अमेरिकी नागरिकका लागि बुक गर्न सहयोग गरिरहेको छैन ? जवाफमा दूतावासले भनेको छ – ‘एयरलाइन्सले पहिलो आउने, सिटको उपलब्धताका आधारमा यात्रा गर्न योग्य हुने सबैलाई रिजर्भेसन खोलेको छ । उडानहरू अमेरिकी नागरिकहरूका लागिमात्र छैनन्। अमेरिकी नागरिकहरूको सुरक्षा र कल्याण हाम्रो प्राथमिकता हो, त्यसैले हामी हाम्रा कूटनीतिक साझेदारहरूसँग नियमित उडानहरू पुनः सुरु हुनका लागि नेपाल सरकारलाई आग्रह गर्न हाम्रो कूटनीतिक साझेदारहरूसँग सम्मिलित हुन्छौं।’
मे १६ र १७ मा नेपालबाट कतार र टर्किस एयरलाइन्सबाट अमेरिका जान सकिने
किन दूतावासले टिकटको मूल्य अत्यन्तै महंगो बनाएको हो ? यो प्रश्नको जवाफमा दूतावासले आफूहरुले टिकटको मूल्य तय नगरेको स्पष्ट पारेको छ । टिकटको मूल्यबारेको प्रश्न एयरलाइन्सलाई नै सोध्न दूतावासले सिफारिस गरेको छ । त्यस्तै अमेरिका जाने उडानमा अमेरिकन नागरिकका लागिमात्र सिटहरु रिजर्भ गर्न पाउनुपर्ने भन्ने प्रश्नको जवाफमा दूतावासले अमेरिका र नेपालबीच सिधा उडान नरहेको तथा यात्रुहरुले एयरलाइन्स वा ट्राभल एजेण्टमार्फत कनेक्ट उडानको टिकट लिनुपर्ने भएकाले ट्राभल एजेण्ट वा एयरलाइन्सलाई सम्पर्क गर्न दूतावासले सुझाव दिएको छ ।
त्यस्तै ती उडानबाट जाने यात्रुको सुचीमा आफूहरुको कूनै भूमिका नरहेको दूतावासको भनाई छ । एयरलाइन्सले पहिलो आउने, सिटको उपलब्धताका आधारमा यात्रा गर्न योग्य हुने सबैलाई रिजर्भेसन खोलेकाले एयरलाइन्स वा ट्राभल एजेण्टलाई सम्पर्क गर्न दूतावासले सुझाव दिएको हो ।