मे १६ र १७ मा नेपालबाट कतार र टर्किस एयरलाइन्सबाट अमेरिका जान सकिने
प्रकाशित मिति : बैशाख ३०, २०७८ बिहीबार
मे १६ र १७ मा नेपालबाट कतार र टर्किस एयरलाइन्सबाट अमेरिका जान सकिने भएको छ । नेपालको सरकारले कतार र टर्किस एयरलाइन्सका दुईवटा चार्टड उडानहरु स्वीकृत गरेको हो ।
जस अनुशार मे १६ आइतबार कतार एयरलाइन्सको र मे १७ सोमबार टर्किस एयरलाइन्सको नेपालबाट चार्टड उडान हुने भएको छ । यी उडानमार्फत अमेरिका आउन चाहनेहरुले ट्राभल एजेन्सीहरुलाई सम्पर्क गर्नुपर्ने जनाइएको छ ।
पहिले किनेका नियमित टिकट चार्टड एयरलाइन्सबाट यात्रा गर्दा प्रयोग गर्न नसकिने जनाइएको छ । नयाँ टिकट बुक गर्नका लागि तोकिएका एजेन्सीलाई पासपोर्टको बायो पेज पठाउनुपर्नेछ । साथै यात्रा गर्नका लागि कोरोना परीक्षणको नेगेटिभ पीसीआर रिजल्ट आवश्यक पर्नेछ ।
नेपालबाट कतार एयरलाइन्सको चार्टड विमानबाट अमेरिका जाँदा अमेरिकामा गन्तब्य अनुशार १६ सय देखि १९ सय डलरसम्म लाग्ने भएको छ । त्यस्तै टर्किस एयरलाइन्सको चार्टड विमानबाट अमेरिका जाँदा अमेरिकामा गन्तब्य अनुशार १५ सय देखि १६ सय डलरसम्म लाग्ने भएको छ ।
कतार एयरलाइन्सबाट मे १६ मा यात्रा गर्न चाहनेले दरबारमार्गमा रहेको प्रेसिडेण्ट ट्राभल एण्ड टुरमा सम्पर्क गर्नुपर्नेछ । कतार एयरलाइन्सबाट यात्रा गर्दा प्रस्थान समयभन्दा ४८ घण्टा अगाडि स्वाब लिइएको नेगेटिभ पीसीआर रिपोर्ट हुनुपर्नेछ ।
त्यस्तै टर्किस एयरलाइन्सबाट मे १७ मा यात्रा गर्न चाहनेहरुले मेगाबाइट ट्राभल्समा सम्पर्क गर्नुपर्नेछ । टर्किस एयरलाइन्सबाट यात्रा गर्दा प्रस्थान समयभन्दा ७२ घण्टा अगाडि स्वाब लिइएको नेगेटिभ पीसीआर रिपोर्ट हुनुपर्नेछ ।