अमेरिकामा बन्दुक नियन्त्रणका लागि राष्ट्रपति बाइडेनबाट कार्यकारी आदेश जारी
प्रकाशित मिति : चैत्र २६, २०७७ बिहीबार
अमेरिकामा आम नरसंहारका घटनाहरु बढिरहेको सन्दर्भमा राष्ट्रपति जो बाइडेनले बन्दुक नियन्त्रणका लागि कार्यकारी आदेश जारी गरेका छन् । सिरियल नम्बर नभएका हातले बनाइएका वा आफै जडान गरिएका बन्दुकहरुमा कडाई गर्नका लागि कार्यकारी आदेश जारी गरिएको हो ।
बाइडेनको कार्यकारी आदेशमा डिपार्टमेन्ट अफ जस्टिसलाई रेड फ्ल्याग कानूनको मोडलका लागि निर्देशन समेत दिइएको छ । जसले आफैलाई वा अरुलाई नोक्सान गर्ने जोखिममा रहेका व्यक्तिबाट अस्थायीरुपमा बन्दुक खोस्न सक्नेछ । त्यस्तै बन्दुक तस्करीका सन्दर्भमा बृहत रिपोर्टका लागि समेत बाइडेनले निर्देशन दिएका छन् ।
बाइडेनले अमेरिकामा भएका बन्दुकको हिंशाका घटनालाई अन्तर्राष्ट्रिय लज्जाको विषय भएको बताएका छन् । ह्वाइट हाउसको रोज गार्डेनमा बोल्नै राष्ट्रपति बाइडेनले अमेरिकाको बन्दुक हिंशालाई महामारी भएको बताएका छन् ।
बाइडेनले बुधबार साउथ क्यारोलिनामा प्रतिष्ठित डाक्टरसहित पत्नी र नातीनातिनीहरुको बन्दुक हिंशाको घटनामा मृत्यु भएको प्रसंग समेत आफ्नो सम्बोधनमा समावेश गरेका छन् । खासगरी बाइडेनले कार्यकारी आदेशमा कथित भूत बन्दुकका सन्दर्भमा कडाई गर्ने रुपरेखा अगाडि सारेका हुन् ।
बन्दुकका लागि आवश्यक पर्ने सामाग्रीहरु किनेर घरमा नै बन्दुक जोड्ने र त्यस्ता बन्दुकमा कुनै सिरियल नम्बर नहुने भएकाले त्यस्ता बन्दुकहरु अमेरिकामा ब्यापक दुरुपयोग भएका छन् । त्यस्ता बन्दुकहरु कस्को नाममा थिए भन्ने ट्रयाक गर्न नसकिने भएकाले त्यस्ता बन्दुकबाट अपराधका घटनाहरु गराइदै आएका छन् । बन्दुकका लागि आवश्यक सामाग्री किन्नका लागि क्रेताको पृष्ठभूमि परीक्षण गर्न आवश्यक नभएकाले त्यस्ता सामाग्री अनलाइन वा पसलबाट सिधै किन्न सकिन्छ ।
बाइडेनले बन्दुक नियन्त्रण ऐन अन्तरगत बन्दुक बनाउने सामाग्रीहरुलाई पनि बन्दुकको रुपमा हेरिनुपर्ने बताएका छन् । बन्दुक बनाउन आवश्यक पर्ने सामाग्रीहरुको पनि सिरियल नम्बर हुनुपर्ने र त्यस्ता सामाग्री किन्न पृष्ठभूमि परीक्षण हुनुपर्ने बाइडेनले बताएका छन् । त्यसो भएमा त्यसरी बनाइएका बन्दुकहरु पनि ट्रयाक गर्न सकिनेछ ।
बाइडेनले संसदलाई बन्दुक सम्बन्धि बिल ल्याउनका लागि प्रोत्साहन गरेका छन् । अब प्राथना अति भएको र केही कदम चाल्ने बेला आएको बाइडेनले बताएका छन् । बन्दुकका सन्दर्भमा भएका छिद्रहरु बन्द गर्न र पृष्ठभूमि परीक्षण बढाउन प्रतिनिधिसभाबाट पारित भइसकेका तीनवटा बिलहरु सिनेटबाट पनि पारित गर्न बाइडेनले प्रोत्साहन गरेका छन् ।
