नेपालमा पनि कोरोनाको दोस्रो लहर, २४ घण्टामा थपिए २६६ संक्रमित
प्रकाशित मिति : चैत्र २३, २०७७ सोमबार
छिमेकी मुलुकमा कोरोनाको दोस्रो लहर भयावह भइरहेका बेला नेपालमा पनि कोरोना संक्रमण तीव्र रुपमा बढेको छ। सोमबार स्वास्थ्य तथा जनसंख्या मन्त्रालयले जनाएअनुसार २४ घण्टामा कोरोना संक्रमण पुष्टि हुनेहरुको संख्या २ सय नाघेको छ।
मन्त्रालयले देशभर ४ हजार ५ सय ३६ जनाको पिसीआर परीक्षण भएकोमा २ सय ६६ जनामा संक्रमण पुष्टि भएको जनाएको हो। यो संख्या आइतबारको भन्दा ९० ले बढी हो।
उपत्यकामामात्रै १ सय ३७ जना संक्रमित थपिएका छन्। तीमध्ये काठमाडौंमा ९८, भक्तपुरमा १३ र ललितपुरमा २६ जना रहेका छन्।
सोमबारमात्रै कोरोना संक्रमणका कारण ४ जनाको मृत्यु भएको छ। योसँगै मृत्यु हुनेको संख्या तीन हजार ३६ पुगेको छ। त्यस्तै एक सय दुई जना संक्रमणमुक्त भएका छन्। हालसम्म एक हजार आठ सय ३२ संक्रिय संक्रमित रहेका छन् भने ६४ जना क्वारेन्टिनमा छन्।
उपत्यकामा प्रवेश गर्ने नाकामा एन्टीजेन परीक्षण
यसैबीच, काठमाडौं उपत्यकामा प्रवेश गर्ने नाकाहरुमा एन्टीजेन परीक्षण गर्न हेल्थ डेस्कको व्यवस्था गरिने भएको छ। सोमबार बसेको काठमाडौं कोभिड-१९ नियन्त्रण तथा रोकथाम समितिको बैठकले नाकाहरुमा सम्बन्धित नगरपालिकाहरुले स्वास्थ्य जाँच र एन्टीजेन टेष्ट गर्न डेस्कको व्यवस्था मिलाउने र सम्पर्क व्यक्ति तोक्ने निर्णय गरेको हो।
एन्टीजेन परीक्षणबाट नेगेटिभ देखिएको तर व्यक्तिमा लक्षण देखिइ शंकास्पद लागेका व्यक्तिलाई पिसिआर परीक्षणका लागि पठाइने निर्णय पनि समितिले गरेको छ।
समितिले यसअघि सबै महानगरपालिका र नगरपालिकामा सञ्चालन गरिएका आइसोलेसन र क्वारेन्टाइन सेन्टरलाई अद्यावधिक गर्ने र सबै नगरपालिकामा १-१ वटा क्वारेन्टाइन र आइसोलेसन सञ्चालन गर्ने निर्णय गरेको छ।
यस्तै, कोभिड-१९ सम्बन्धी जनस्वास्थ्य मापदण्ड पूर्ण पालना नगर्नेलाई कारबाही गरेर जरिवाना गर्ने, कोभिडसम्बन्धी जनचेतना फैलाउन नर्स, स्वास्थ्यकर्मी र शिक्षकरशिक्षिकालाई परिचालन गर्ने निर्णय पनि भएको छ।
कोभिड संक्रमित केसहरुको पहिचान र कन्ट्याक्ट ट्रेसिङ गर्न महानगरपालिका र नगरपालिकालाई अनुरोध गर्ने निर्णय पनि बैठकले गरेको छ।
कोरोनाको दोस्रो डोज वैशाख ७ देखि
यसैबीच, स्वास्थ्य तथा जनसंख्या मन्त्री हृदयदेश त्रिपाठी कोरोना खोपको दोस्रो डोज वैशाख ७ गतेदेखि लगाइने जानकारी दिएका छन्।
प्रतिनिधिसभाको सोमबारको बैठकमा बोल्दै उनले खोपको दोस्रोमात्रा वैशाख ७ देखि ११ गतेसम्म लगाइने जानकारी दिएका हुन्।