अमेरिका आउन डिभी विजेताको अभियान, पुनरावलोकन भइरहेको बाइडेन प्रशासनका वकिलको भनाई
प्रकाशित मिति : फाल्गुन २, २०७७ आईतबार
डिभी विजेतालाई अमेरिका आउनका लागि अनुमति प्रदान गर्न पूर्व राष्ट्रपति डोनाल्ड ट्रम्पको कार्यकारी आदेश उल्टाउन राष्ट्रपति जो बाइडेनसमक्ष माग गर्दै अभियान सुरु गरिएको छ । आर्थिक बर्ष २०२१ का डिभी लोटरी विजेताहरुलाई ट्रम्पको कार्यकारी आदेशले मार्चको अन्तिमसम्म अमेरिका आउनमा रोक लगाएको छ भने गत सेप्टेम्बरमा भिसा पाएका २०२० का डिभी विजेताहरु पनि अमेरिका आउन पाएका छैनन् ।
सेभ डाइभर्सिटी भिसा ह्यासट्याग सहित वेवसाइटको सुरुवात गरिएको छ । सयौं डिभी विजेताहरुले ट्रम्पले घोषणा गरेको र बाइडेनको कार्यभार सम्हाल्नुभन्दा झण्डै तीनसाता अगाडि मार्चसम्मका लागि थप गरेको कार्यकारी आदेश उल्टाउन माग गरेका छन् । ट्रम्पको कार्यकारी आदेशका कारण भिसा पाएका सयौं नेपालीहरु समेत अमेरिका आउन पाएका छैनन् । उनीहरुको भिसा मार्चभरीमा समाप्त हुँदैछ ।
यसअगाडि बाइडेनले उक्त कार्यकारी आदेश खारेज गर्ने बताइएको थियो । ह्वाइटहाउसका अधिकारी इस्थर ओलाभारियाले मेयरहरुसँगको एउटा भर्चुअल बैठकमा बाताएका थियो । तर त्यस्तो कार्यकारी आदेश कहिले जारी गर्नेभन्नेबारे केही खुलाइएको थिएन । इस्थर ओलाभारिया राष्ट्रपति बाइडेनका एकजना उच्च अध्यागमन सल्लाहकार हुन् भने ह्वाइट हाउसका घरेलु नीति काउन्सिलका डेपुटी डाइरेक्टर समेत हुन् ।
अहिले बाइडेन प्रशासनका लागि एकजना वकिलका अनुशार सरकारले ट्रम्पको उक्त कार्यकारी आदेश खारेज गर्ने वा नगर्ने सन्दर्भमा विचार गरिरहेको बताएका छन् । कतिपय कानुन व्यवसायीले बाइडेनले कार्यकारी आदेश खारेज नगरेपनि मार्चमा भिसा सकिदै गरेका डिभी विजेताहरुको भिसा थपिनसक्ने अनुमान गरेका छन् ।
र्
एकहजार भन्दा धेरै डिभी विजेताहरुको भिसा समाप्त भइसकेको छ भने आगामी मार्च १ देखि ३० भित्र झण्डै ६ हजारको भिसा समाप्त हुन लागेको जनाइएको छ । ट्रम्पले कार्यकारी आदेशमार्फत सन् २०२० को भिसाको औचित्य समाप्त गरेकोमा संघीय अदालतले त्यसको बिरुद्धमा फैसला गरेपछि सेप्टेम्बरमा सयौ नेपालीहरुले डाइभर्सिटी भिसा प्राप्त गरेका थिए । उनीहरुको भिसाको अवधि पनि मार्चमा सकिदैछ ।
युएस डिस्ट्रिक्ट कोर्ट वासिंटन डिसीका न्यायाधिस अमित मेहताले सन् २०२० का डिभी विजेताहरुलाई भिसा जारी गर्न आदेश दिएपछि सेप्टेम्बरको दोश्रो सातादेखि डिभी विजेताहरुलाई भिसा जारी गर्न सुरु गरिएको थियो । उनीहरुले सेप्टेम्बरको अन्त्यसम्म भिसा पाएका थिए । तर उनीहरु ट्रम्पको आप्रवासन रोक जारी रहँदासम्म अमेरिका आउन नपाउने भएकाले नेपालमै रोकिएका छन् ।
अदालतको आदेशपछि डाइभर्सिटी भिसा प्राप्त गर्न सफल नेपालीहरु ४०४ जना रहेको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । जसमध्ये २२५ जना प्राथमिक डिभी विजेता नेपाली रहेका थिए भने १०५ जना उनीहरुका दम्पत्ति थिए । त्यस्तै ७४ जना उनीहरुका छोराछोरीहरु रहेका थिए ।
काठमाडौंमा रहेको अमेरिकी दूतावासलेमात्र सेप्टेम्बरमा ३७९ जना डिभी विजेताहरुलाई भिसा जारी गरेको थियो । जसमध्ये २१२ जना प्राथमिक डिभी विजेताहरु, ९५ जना उनीहरुका दम्पत्ति र ७२ जना उनीहरुका छोराछोरीहरु रहेका थिए । अदालतको आदेशपछि आफूहरुले सकेजतिलाई भिसा जारी गरेको काठमाडौंस्थीत नेपाली दूतावासले जनाएको थियो ।
सन् २०२० का लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये झण्डै साढे १३ सय जना प्राथमिक डिभी विजेताहरुलेमात्र अमेरिकाको भिसा प्राप्त गर्न सफल भए ।
सन् २०२१ का लागि डिभी विजेता नेपालीहरुको संख्या भने ३८०१ रहेको छ । सन् २०२१ का डिभी लोटरी पारेकाहरुले आगामी अक्टोबर १ देखि भिसा पाउन सुरु गर्ने नियम भएपनि भिसा पाउनमा ढिलो भएको छ ।
सन् २०२१ का डिभी विजेताहरुमा नेपाल एसियामा दोश्रो भएको छ । सबैभन्दा धेरै डिभी विजेताहरु इरानका ६ हजार १ जना रहेका छन् । सन् २०२१ का लागि विश्वमै सबैभन्दा धेरै डिभी विजेताहरु भने इजिप्टका ६ हजार २ जना रहेका छन् । त्यस्तै अल्जेरियाका ६ हजार १ जना र सुडानका ६ हजार १ जना रहेका छन् ।
आर्थिक बर्ष २०२२ का गत अक्टोबर ७ देखि डिभीका लागि आवेदन खुलेकोमा नोभेम्बर १० सम्म डिभी लोटरी भरिएको थियो । यो डिभीको नतिजा भने सन् २०२१ को मे ८ मा सार्वजनिक हुनेछ ।