मार्च २७ पछि जुन ८ सम्म ३५६७ नेपालीले छाडे देश, विमानबाट नेपाल फर्कनेहरु २२२
प्रकाशित मिति : जेष्ठ ३२, २०७७ आईतबार
कोरोनाको महामारी सुरुभएदेखि मार्च २७ पछि जुन ८ सम्म ३५६७ जना नेपालीले विमानबाट देश छाडेका छन् । मार्च २४ देखि नेपाल सरकारले मुलुकभर लकडाउनको घोषणा गरेर सबै अन्तर्राष्ट्रिय उडान र सीमा नाकाहरु बन्द गर्ने घोषणा गरेको थियो ।
यो अवधिमा चार्टड उडानमार्फत विभिन्न देशहरुले आफ्ना नागरिकहरु उद्दार गरेर लैजान सकिने नेपाल सरकारले व्यवस्था गरेको थियो । ती चार्टड उडानहरुमार्फत नेपालबाट बाहिरिने कुनै पनि मुलुकका नागरिकको तुलनामा नेपालीहरु सबैभन्दा धेरै रहेका छन् ।
अध्यागमन अधिकृत पवनकुमार गुप्ताका अनुशार यो अवधिमा ३५६७ जना नेपालीहरुले विमानबाट नेपाल छाडेपनि उनीहरु कहाँ कहाँ गए भन्नेबारे स्पष्ट खुलाइएको छैन । विदेशको पीआर र ग्रिनकार्ड भएका कैयन नेपालीहरु यो अवधिमा नेपालबाट बाहिरिएका थिए ।
अमेरिकी नागरिकका ग्रिनकार्डवाहक परिवारका सदस्यहरु पनि यो अवधिमा अमेरिका आएका छन् । त्यस्तै अमेरिकाको आप्रवासी भिसा पाइसकेकाहरुमध्ये केही व्यक्ति यो अवधिमा अमेरिका आएका छन् । लकडाउनको यो अवधिमा ३५६७ नेपाली बाहेक विभिन्न अन्य देशका नागरिकहरु गरी ९ हजार ९ सय २६ जनाले नेपाल छाडेका छन् ।
यही अवधिमा विमानबाट नेपाल फर्कने नेपालीहरुको संख्या भने जम्मा २२२ रहेको छ । यो जुन ८ सम्मको रेकर्ड हो भने त्यसपछि पनि केही नेपालीहरु स्वदेश फर्किएका छन् । जुन ११ मा कुवेत सरकारको सहयोगमा ३३५ नेपाली स्वदेश फर्किएका थिए । बर्मा र युएईबाट फर्केकाहरुको संख्या भने २ सय २२ भित्र नै रहेको छ ।