नेपालको अध्यागमन सोमबारदेखि खुल्ने, जुन २९ भित्र नेपाल छाड्नेको भिसा नियमन एयरपोर्टमै
प्रकाशित मिति : जेष्ठ ३२, २०७७ आईतबार
नेपालको अध्यागमन विभागले कोरोनाको महामारीका कारण बन्द रहेको सेवा सोमबारदेखि सेवा सुचारु गर्ने भएको छ । विभागले नयाँ भिसा, नविकरण र थप लगायतका प्रकृयाहरु सुचारु गर्ने भएको छ ।
आगामी जुन २९ भित्र नेपालबाट प्रस्थान गर्नेहरुले भने विभागमा गएर भिसा नविकरण गरिरहन नपर्ने जनाइएको छ । उनीहरुको भिसा नियमनको काम प्रस्थानकै समयमा अध्यागमन कार्यालय त्रिभुवन अन्तर्राष्ट्रिय विमानस्थलबाट हुनेभएको छ । तर उनीहरुको भिसा मार्च २१ सम्म भने अद्यावधिक भएको हुनुपर्नेछ ।
ती बाहेक अन्यले भिसा नविकरण वा अवधि थप्नका लागि अध्यागमन विभागको वेवसाइटमा अनलाइनमार्फत फर्म भर्नुपर्नेछ । फर्म भरिसकेपछि सब्मिसन आईडी लिएर तोकिएको मिति र समयमा मात्र विभागमा सम्पर्क गर्न सुझाव दिइएको छ । अनलाइन आवेदन दिएकाहरुलाई विभागले फोन सम्पर्क गरेर उपस्थीत हुने समय उपलब्ध गराउनेछ ।
विभागमा आउँदा अन्य असम्बन्धित व्यक्तिलाई नल्याउन सुझाव दिइएको छ । त्यस्तै वैवाहिक बाहेक अन्य नाता भिसा नविकरण गर्न आउँदा सनाखत गर्ने व्यक्ति ल्याउन नपर्ने तर पहिलो पटक नाता भिसा लिन आउनेहरुले सनाखत गर्ने व्यक्ति अनिवार्य रुपमा ल्याउन सुझाव दिइएको छ ।
१० बर्षभन्दा मुनीका नावालकको भिसा थप गर्न अभिभावकमात्र आए पुग्ने र नावालकलाई साथमा ल्याउन नपर्ने जनाइएको छ । विभागमा आउँदा मास्कको प्रयोग अनिवार्य गर्न र कम्तीमा २ मिटरको सामाजिक दुरी कायम गर्न भनिएको छ ।