नेशनल भिसा सेन्टरबाट कागजी पत्रको जवाफ दिन बन्द, पत्र नपठाउन आग्रह
प्रकाशित मिति : जेष्ठ २४, २०७७ शनिबार
अमेरिकाको विदेश मन्त्रालय अन्तरगत नेशनल भिसा सेन्टरले कागजी पत्रको जवाफ दिन बन्द गरेको छ । आफ्नो केसको बारेमा सोधखोज गर्नुपरेमा अबदेखि हुलाकबाट कागजी पत्र नपठाउन नेशनल भिसा सेन्टरले सबैलाई आग्रह गरेको छ ।
नेशनल भिसा सेन्टरले अमेरिकामा आप्रवासी भिसामा आउनेहरुको आवेदन प्रकृयामा लैजाने काम गर्छ । अमेरिकी ग्रिनकार्डवाहक वा नागरिकले आफ्ना परिवारका सदस्यहरुलाई अमेरिकामा ल्याउनुपरेमा नेशनल भिसा सेन्टर हुँदै भिसाको प्रकृया अगाडि बढाउनुपर्छ ।
सोमबारदेखि लागु हुनेगरी कागजी सोधखोज बन्द गरिएको नेशनल भिसा सेन्टरले जनाएको छ । अबदेखि नेशनल भिसा सेन्टरले कसैले आफ्नो केसको बारेमा हुलाकमार्फत पत्र पठाएर सोधखोज गरेमा त्यस्ता पत्रको जवाफ दिनेछैन, त्यस्ता पत्रहरु सिधै नष्ट गर्नेछ । नेशनल भिसा सेन्टरलाई आधुनिकीकरण गर्न र आवेदनहरुलाई व्यवस्थीत गर्न कागजी पत्रको प्रकृया अन्त्य गरेको भिसा सेन्टरले जनाएको छ ।
जुन १ वा त्योभन्दा पछाडिको पोष्टमार्क भएका पत्रको भिसा सेन्टरले जवाफ नदिने जनाएको छ । अबदेखि कुनै कुराको सोधखोज गर्नुपरेमा अनलाइनमार्फत गर्नुपर्ने भएको छ । आफ्नो केसबारे नेशनल भिसा सेन्टरमा सोधीखोजी गर्नुपरेमा अबदेखि अनलाइनमार्फत यो फर्म भर्नुहोला ।
यसरी सोधीखोजी गर्दा तपाईले केस नम्बर वा युएससीआईएसको रिसिप्ट नम्बर, प्राथमिक आवेदकको नाम, जन्ममिति, इमेल ठेगाना लगायतका विवरणहरु भर्नुपर्छ । र, आफ्नो प्रश्न टाइप गरेर पठाउन सकिन्छ । कुनै डमुमेन्ट भएमा पनि अट्याच गरेर पठाउन सकिने व्यवस्था गरिएको छ ।
यदि नेशनल भिसा सेन्टरले इमेल गरेर, फोन गरेर वा पत्र पठाएर कुनै कागजात हुलाकबाट पठाउन अनुरोध गरेको खण्डमा भने तपाईले त्यस्ता कागजातहरु हुलाकबाट नै पठाउनुपर्छ । तर कुनै पनि कागजात पठाउँदा ओरिजिनल कागजात नपठाई फोटोकपीमात्र पठाउन नेशनल भिसा सेन्टरले अनुरोध गरेको छ ।
अनलाइनबाट सोधीखोजी गर्दा एउटै प्रश्न बारम्बार नपठाउन समेत अनुरोध गरिएको छ । एउटै प्रश्न बारम्बार पठाउँदा जवाफ दिनमा ढिलाई हुने समेत नेशनल भिसा सेन्टरले जनाएको छ । कुनै प्रश्नको फ्लोअप सोधीखोजी गर्दा कम्तीमा एकसाता कुर्न सुझाव दिइएको छ ।