अन्सोबाट अमेरिकाका ९ कलेजका नेपाली विद्यार्थीलाई जनही २०५ डलरसम्म सहयोग
प्रकाशित मिति : जेष्ठ २, २०७७ शुक्रबार
अमेरिकामा रहेको युनाइटेड नेपलिज स्टुडेण्ड युनियन अन्सोले अमेरिकामा एफवान स्टाटसमा रहेका १२ जना विद्यार्थीहरुलाई एकसयदेखि २०५ डलरसम्म सहयोग गरेको छ । त्यस्तै विद्यार्थीलाई ३ सय डलरको ग्रोसरी र औषधीका लागि १५० डलर समेत उपलब्ध गराएको अन्सोका प्रतिनिधि विजयमान सिंहले जानकारी दिएका छन् ।
युनिभर्सिटी अफ न्यु ह्याभन, काल्डवेल युनिभर्सिटी, क्वीन्स कलेज, डेब्राई युनिभर्सिटी, ट्रुम्यान स्टेट युनिभर्सिटी, इस्ट वेष्ट युनिभर्सिटी, योर्क कलेज, सेन्ट जोसेफ कलेज र लागुआर्डिया कम्युनिटी कलेजका विद्यार्थीहरुलाई एकसयदेखि २ सय ५ डलरसम्म सहयोग प्रदान गरिएको हो । अहिले एफ वान स्टाटसमा रहेका विद्यार्थीहरुलाई नगदको अत्यन्तै खाँचो रहेकाले संस्थाका तर्फबाट सक्दो सहयोग उपलब्ध गराइएको सिंहले बताए ।
अहिलेसम्म संकलित २५६० डलरबाट ग्रोसरी र औषधीमा ४५० डलर र बाँकी २११० डलर विद्यार्थीहरुलाई नगद सहयोग गरिएको छ ।
न्युजर्सीको काल्डवेल युनिभर्सिटीका विद्यार्थीहरुलाई ३ सय डलरको ग्रोसरी सामाजिक अभियन्ता डाक्टर विष्णुमाया परियारमार्फत पुर्याइएको थियो । संकलित सबै रकम सहयोगमा वितरण गरिएको र सहयोग संकलन अभियान अझै जारी रहेको भन्दै संस्थाका तर्फबाट सहयोगका लागि अपिल गरिएको छ ।
विद्यार्थीको सहयोगका लागि गोफमण्डी एकाउन्ट समेत बनाइएको छ । यदि तपाई गोफण्डमीमा गएर सहयोग गर्न चाहनुहुन्छ भने यहाँ क्लिक गर्नुहोला ।
अन्सोका प्रतिनिधि सिंहले पहिलो राउण्डमा सहयोग वितरण गरिएको र रकम संकलन भएमा आगामी दिनमा पनि सहयोग गरिने बताउँदै समस्यामा परेका विद्यार्थीहरुलाई सम्पर्क गर्न आग्रह गरेका छन् । समस्यामा परेका नेपाली विद्यार्थीहरुले विजयमान सिंहलाई ३४७ ४७१ ७३३३, सन्तोष महर्जनलाई ७१८ ५१० २०७४ मा, चन्द्रबिक्रम मल्ललाई ६०१ २९१ ३८८६ मा वा [email protected] मा सम्पर्क गर्न सक्नेछन् ।