यी व्यक्तिले तत्काल ट्याक्स फाइल नगरे नपाउनसक्छन् १२ सय डलरको चेक
अमेरिकी सरकारले कोरोनाको महामारीसँग जुध्न राहत प्याकेजको घोषणा गरेको छ । जस अन्तरगत हरेक करदाताले १२ सय डलर प्राप्त गर्नेछन् । जुन रकम अबको तीनसातामा करदाताको बैंक खातामा पठाइने डिपार्टमेन्ट अफ ट्रेजरीका सेक्रेटरीले बताएका छन् ।
तर यदि कोही व्यक्तिले सन् २०१८ वा सन् २०१९ मा ट्याक्स फाइल गरेको छैन भने उक्त व्यक्तिले सो रकम प्राप्त नगर्नसक्छ । उदाहरणका लागि कोही व्यक्तिले सन् २०१८ मा कुनै आम्दानी नभएका कारण ट्याक्स फाइल गरेको छैन र सन् २०१९ मा आम्दानी गरेको छ तर अहिलेसम्म ट्याक्स फाइल गरेको छैन भने उसले पनि सो रकम नपाउन सक्छ ।
‘यदि कसैले सन् २०१८ मा कुनै आम्दानी गरेको छैन । तर सन् २०१९ मा आम्दानी गरेको छ, अहिलेसम्म २०१९ को ट्याक्स फाइल गरेको छैन भने उसले तुरुन्त ट्याक्स फाइल गर्नुपर्छ नत्र राहत स्वरुप प्राप्त हुने १२ सय डलर प्राप्त नहुनसक्छ ।’ – अमेरिकाका चर्चित नेपाली सीपीए विराज रिजालले जानकारी दिए ।
त्यस्तै कोही व्यक्ति सन् २०१८ को उत्तरार्धमा वा सन् २०१९ को पूर्वार्धमा अमेरिका आएको छ र सन् २०१९ मा ट्याक्समा काम गरेको छ भने उसले पनि अहिलेसम्म सन् २०१९ को ट्याक्स फाइल नगरेको हुनसक्छ । किनभने सन् २०१९ को ट्याक्स फाइलका लागि अझै जुलाई १५ सम्मको म्याद छ । त्यस्ता व्यक्तिले पनि तुरुन्तै ट्याक्स फाइल नगरे १२ सय डलरको राहत रकम प्राप्त नगर्नसक्छन् ।
त्यसैगरी सन् २०१८ मा ट्याक्स फाइल गर्दा १२ सय डलरको रकम पाउने योग्यताभन्दा बढी आम्दानी गरेको छ तर सन् २०१९ को आम्दानी १२ सय डलरको चेक प्राप्त गर्न सक्ने योग्यताभित्र रहेको छ भने त्यस्तो व्यक्तिले समेत तुरुन्त ट्याक्स फाइल गर्न सुझाव दिइएको छ । नत्र पुरानो योग्यताको आधारमा बढी आम्दानी भएका कारण १२ सय डलरको राहत प्राप्त नहुने अवस्था आउनसक्छ ।
अमेरिकी सरकारले ज्वाइन्ट फाइल गरेकाहरुलाई २४ सय डलर र १७ बर्ष भन्दा कम उमेरका बच्चा हुनेहरुलाई थप ५ सय डलरका दरले रकम दिने घोषणा गरेको छ । यदि कोही व्यक्तिले सन् २०१८ मा सिंगल फाइल गरेको छ तर सन् २०१९ मा उसको अवस्थामा परिवर्तन भएको छ भने उसले परिवर्तित अवस्थाका कारण प्राप्त हुने रकमका लागि समेत तुरुन्त ट्याक्स फाइल गर्न सुझाव दिइएको छ ।
२ ट्रिलियन अमेरिकी डलरको यो प्याकेजमा एकजना करदातालाई १२ सय डलर, विवाहितलाई २४ सय डलर र १७ बर्षभन्दा कम उमेरका परिवारका सदस्यका लागि थप ५ सय डलर प्रदान गरिने उल्लेख गरिएको छ । बार्षिक ७५ हजार भन्दा कम आम्दानी हुने एकजनालाई १२ सय डलर प्रदान गरिने छ । यदि दम्पत्तिले ज्वाइन्ट ट्याक्स फाइल गरेका छन् र उनीहरुको आम्दानी बार्षिक १ लाख ५० हजार भन्दा कम रहेको छ भने उनीहरुले २४ सय डलर प्राप्त गर्नेछन् ।
७५ हजारभन्दा बढी आम्दानी हुनेहरुका सन्दर्भमा हरेक एकसय डलर बढी आम्दानीमा ५ डलर घटाउँदै लगिनेछ । ९९ हजारसम्म आम्दानी हुनेलेमात्र रकम प्राप्त गर्नेछन् जस अनुशार कसैको ८० हजार आम्दानी छ भने उसले ९५० प्राप्त गर्नेछ भने ९० हजार आम्दानी हुनेले ४५० प्राप्त गर्नेछ ।
त्यस्तै विवाहित जोडीको सन्दर्भमा १ लाख ५० हजार भन्दा धेरै बार्षिक आम्दानी हुनेले हरेक १ सय डलरमा ५ डलर घटाउँदै हिसाब गरेर रकम दिइनेछ । अर्थात् यदि कसैको १ लाख ६० हजार बार्षिक आम्दानी छ भने उनीहरुले १९ सय डलर पाउनेछन् । अधिकतम १ लाख ९८ हजार आम्दानी हुने जोडीलेमात्र रकम पाउनेछन् ।
राहत प्याकेजबारे २१ प्रश्नोत्तर: कस्ले पाउनेछ १२ सय ? कस्ले पाउनेछ साप्ताहिक ६ सय ?
मैले कति रकम पाउनेछु ?
अधिकांश बयस्कहरुले १२ सय डलर पाउनेछन् । यो बार्षिक आम्दानीका आधारमा निर्धारण हुने भएकाले कतिपयले त्यो भन्दा पनि कम रकम पाउनेछन् । १६ बर्षभन्दा कम उमेरका व्यक्तिका लागि थप ५ सय डलर दिइनेछ ।
यो रकम मैले कतिपटक पाउनेछु ?
अहिलेका लागि एकपटकमात्र । तर कोरोनाको महामारीका कारण स्थीतिमा सुधार नआएमा भविश्यमा नयाँ बिलहरु पनि आउनसक्नेछन् ।
मैले पूरै रकम पाउँछु कि पाउँदिन भन्ने कसरी थाहा पाउने ?
यो तपाईको आम्दानीमा भर पर्छ । यदि तपाईको बार्षिक आम्दानी ७५ हजार डलरभन्दा कम छ भने तपाईले १२ सय डलर पाउनु हुनेछ । दम्पत्तिको ज्वाइन्ट ट्याक्स फाइल गर्नुभएको छ र आम्दानी १ लाख ५० हजार भन्दा कम छ भने २४ सय डलर पाउनुहुनेछ । यदि तपाईले हाउसहोल्डको प्रमुखका रुपमा कर फाइल गर्नुभएको छ र आम्दानी १ लाख १२ हजार ५ सय भन्दा कम छ भने पनि पूरै रकम पाउनुहुनेछ ।
तर ९९ हजार भन्दा बढी आम्दानी हुने व्यक्ति, १ लाख ९८ हजार भन्दा बढी आम्दानी हुने दम्पत्ति र २ लाख १८ हजारभन्दा धेरै आम्दानी हुने २ बच्चासहितको परिवार रकम प्राप्त गर्न योग्य हुनेछैन ।
यदि तपाई बयस्क हुनुहुन्छ तर कसैले तपाईलाई डिपेन्डेन्ट दाबी गरेर ट्याक्स फाइल गरेको छ भने तपाईले रकम पाउनुहुनेछैन । रकम प्राप्त गर्नका लागि सबैको सोसल सेक्युरिटी नम्बर हुन जरुरी छ ।
कलेजमा पढ्ने विद्यार्थीहरुले पनि केही पाउँछन् कि ?
यदि उनीहरुलाई कसैले डिपेन्डेन्ट दावी गरेर ट्याक्स फाइल गरेका छन् भने उनीहरुले केही पाउँदैनन् । सामान्यतया २४ बर्षभन्दा मुनीको विद्यार्थीको खर्च बाबुआमाले बेहोर्ने गरी डिपेन्डेन्ट फाइल गरिने भएकाले उनीहरुले रकम पाउने सम्भावना हुँदैन । तर उनीहरुले काम पनि गरेका छन्, डिपेन्डेन्ट होइनन् र ट्याक्स फाइल गरेका छन् भने रकम प्राप्त गर्नेछन् ।
कुन बर्षको ट्याक्स फाइलका आधारमा निर्धारण हुनेछ ?
यदि तपाईले सन् २०१९ को ट्याक्स फाइल गरिसक्नुभएको छभने त्यही आधारमा निर्धारण हुन्छ । यदि गर्नुभएको छैन भने सन् २०१८ को ट्याक्स फाइलका आधारमा निर्धारण हुनेछ ।
सन् २०१९ को आम्दानी बढी भएका कारण म त्यो रकम प्राप्त गर्न योग्य छैन । तर सन् २०२० को आम्दानी कम हुने भएकाले रकम प्राप्त गर्न सकुँला ?
अहिलेसम्म यो अवस्थाका व्यक्तिलाई यो प्याकेजमा कुनै राहतको व्यवस्था छैन । तर तपाई साना विजनेशको लागि ऋण प्राप्त गर्न वा वेरोजगारी सुविधा लिन भने योग्य हुनसक्नुहुनेछ ।
के मैले रकम प्राप्त गर्न कतै आवेदन दिनुपर्छ ?
पर्दैन । यदि आईआरएससँग पहिले नै तपाईको बैंक एकाउन्टको सुचना छ भने तपाईको ट्याक्स फाइल गरेको आम्दानीका आधारमा उक्त रकम सिधै तपाईको बैंक खातामा पठाइनेछ । तपाईले पछिल्लो ट्याक्स फाइल गर्दा डाइरेक्ट डिपोजिटका लागि बैंक खाता दिनुभएको खण्डमा सिधै बैंक खातामा आउनेछ ।
यो रकम कहिलेसम्म आइपुग्ला ?
अमेरिकी अर्थमन्त्रीले यो रकम तीनसाताभित्र प्राप्त हुने बताएका छन् ।
मैले प्राप्त रकम कतै अन्तै गयो कि भनेर कसरी थाहा पाउने ?
तपाईका नाममा रकम जारी भएको केहीदिनमै उक्त सुचनासहित तपाईलाई पत्र प्राप्त हुनेछ । उक्त सुचनामा कसरी रकम प्रदान गरिएको छ भन्ने पनि उल्लेख हुनेछ । यदि सुचना प्राप्त गरिसकेपछि पनि तपाईले रकम प्राप्त गर्न सक्नुभएन भने आईआरएसमा सम्पर्क गर्न सक्नुहुनेछ ।
यदि मैले हालै ट्याक्स फाइल गर्नुभएको छैन भने मैले रकम प्राप्त गर्ने कुरामा असर गर्छ ?
गर्नसक्छ । त्यसैले तुरुन्तै ट्याक्स फाइल गर्नुहोला । कम्तीमा २०१८ सम्मको ट्याक्स फाइल गर्नुहोला । सन् २०१८ को पनि ट्याक्स फाइल रेकर्ड नभएकाहरुलाई यो रकम प्राप्त गर्न समस्या हुनसक्ने आइआरएसले जनाएको छ ।
मैले सोसल सेक्युरिटी रिटायर्डमेन्ट र अपांगता रकम पाइरहेको छु । के मैले यो राहत रकम पनि पाउनेछु ?
पाउनुहुनेछ ।
के मैले यो राहत रकमको ट्याक्स तिर्नुपर्छ ?
पर्दैन ।
वेरोजगार सुविधाबारे
मैले वेरोजगार सुविधा कसरी पाउनेछु ?
यो बिलले सामान्यतया बेरोजगार सुविधा पाउने बाहेककालाई समेत समेटेको छ । जसमा सेल्फ इन्प्लोयड र पार्ट टाइम कामदार समेत छन् । सारमा, जो कोरोना भाइरसका कारण बेरोजगार भएका छन् वा आंशिक बेरोजगार भएका छन्, उनीहरुले वेरोजगारवापत पनि रकम पाउनेछन् ।
यसबापत मैले कति रकम पाउनेछु ?
यो राज्यहरुमा भरपर्छ । सामान्यतया अमेरिकामा औषत कामदारले साप्ताहिक एकहजार डलर कमाउँछन् । त्यसको ४० देखि ५० प्रतिशत रकम वेरोजगारी सुविधाबाट प्राप्त हुन्छ । बाँकी खालीठाउँ भर्नका लागि यो बिलले सहायता गर्नेछ । यो प्याकेज अनुशार योग्य कामदारहरुले राज्यबाट पाउने रकमको अतिरिक्त साप्ताहिक ६ सय डलर प्राप्त गर्नसक्नेछन् ।
उदाहरणका लागि अलाबामामा साप्ताहिक वेरोजगारी अधिकतम रकम २७५ डलर रहेको छ, त्यहाँका व्यक्तिले राज्यको २७५ र प्याकेजबाट पाउने ६ सय गरी ८७५ साप्ताहिक रुपमा पाउनसक्नेछन् । क्यालिफोर्नियामा भने राज्यले ४५० र न्युजर्सीमा ७१३ डलरसम्म प्रदान गर्नसक्नेछ, त्यहाँका व्यक्तिले थप ६ सय डलर प्राप्त गर्दा पाउनेरकम साप्ताहिक १३१३ डलर सम्म हुनेछ ।
उदाहरणका लागि न्युयोर्कमा कामगर्ने व्यक्तिले साप्ताहिक ११ सय डलर कमाइरहेको छ र राज्यबाट बेरोजगारी स्वरुप ५ सय ४ डलर प्रतिहप्ता पाएमा उसले प्याकेजबाट पाउने ६ सय डलरसहित साप्ताहिक कुल ११ सय ४ डलर पाउनेछ ।
स्वतन्त्र रुपमा काम गर्ने, स्वतन्त्र कन्ट्राक्टर र सेल्फ इम्प्लोयडलाई पनि प्याकेजले समेट्छ ?
समेट्छ । सेल्फ इम्प्लोयडहरु पनि बेरोजगारी सुविधा पाउने नयाँ परिभाषाभित्र परेका छन् । तर सुविधाको रकम पहिले उनीहरुको आम्दानीका आधारमा निर्धारण गरिनेछ । सेल्फ इम्प्लोयडह पनि संघीय सरकारबाट पाउने साप्ताहिक ६ सय डलरका लागि योग्य हुनेछन् ।
म पार्टटाइम कामदार हुँ । कोरोना भाइरसका कारण मैले जागिर गुमाएँ । तर मेरो राज्यले पार्टटाइम कामदारलाई कभर गर्दैन । के म योग्य हुन्छु ?
तपाई योग्य हुनुहुनेछ । पार्टटाइम कामदारहरु समेत यो सुविधाका लागि योग्य हुनेछन् । तर राज्यबाट कति पाउने भन्ने कुरा राज्यमा भर पर्छ । यद्यपी संघीय सरकारबाट पाउने साप्ताहिक ६ सय डलरका लागि पनि उनीहरु योग्य हुनेछन् ।
म भर्खरै नयाँ जागिर सुरु गर्न लागेको थिएँ । तर कोरोनाका कारण त्यहाँ काम गर्न नसक्ने भएँ । अब मैले सुविधा पाउँछु ?
पाउनुहुनेछ । तपाईले भर्खरै काम छाड्नुपर्ने अवस्था आएको खण्डमा वा कामको धेरै इतिहास नभएको खण्डमा पनि तपाई यो सुविधाका लागि योग्य हुनुहुनेछ ।
मैले भर्खरै कोरोनाका कारण आफै काम छाडें, यो अवस्थामा सुविधा पाउनेछु ?
यदि तपाईले आफै काम छाड्नुभएको हो र रोजगारदाताले कामबाट निकालेको वा वेतलवी विदामा पठाएको होइन भने यसमा विभिन्न कारणमा भर पर्नेछ । यदि स्वास्थ्यसंस्थाले तपाईलाई क्वारेन्टाइनमा बस्न भनेको थियो, वा तपाईले प्राथमिक केयरगिभर हुनुहुन्छ र तपाईको बच्चाको डेकेयर बन्द भएको छ भने यस्तो अवस्थामा तपाईले सुविधा पाउनुहुनेछ । तर कोरोना भाइरस सर्ने डरका कारण आफै काम छाडेकाहरुलाई पनि राहतले समेट्नेछैन ।
मेरो रोजगारदाताले काम गर्ने स्थान बन्द गरे । म योग्य हुन्छु ?
तपाई योग्य हुनुहुनेछ । यदि तपाईको रोजगारदाताले काम बन्द गरेका कारण तपाई काममा जान सक्नुभएको छैन भने तपाई यो सुविधाका लागि योग्य हुनुहुनेछ ।
यदि कसैको घरको मुख्यव्यक्तिको कोरोना भाइरसका कारण मृत्यु भएमा र अरुले काम गर्न नसक्ने स्थीति भएमा अरु सदस्यले सुविधा पाउनेछन् ?
अवश्य पनि पाउनेछन् ।
मैलै पहिलेदेखि नै वेरोजगारी सुविधा लिइरहेको छु । मैले संघीय सरकारबाट पाउने साप्ताहिक ६ सय डलर पनि पाउनेछु ?
यदि तपाई पहिलेदेखि नै बेरोजगारी सुविधा लिनइरहनुभएको छ भने तपाईले संघीय सरकारबाट पाउने साप्ताहिक ६ सय डलर थप पाउनुहुनेछ ।
