गाँजा सेवनका कारण चर्चित गायक निल योंगको अमेरिकी नागरिकता ढिलाई
प्रकाशित मिति : कार्तिक २४, २०७६ आईतबार
गाँजा सेवनका कारण चर्चित गायक निल योंगको अमेरिकी नागरिकतामा ढिलाई भएको खुलासा भएको छ । आफूले सन् २०२० को राष्ट्रपतिको चुनावमा मतदान गर्ने अपेक्षा गरेपनि गाँजाका कारण अमेरिकी नागरिकतामा ढिलाई भएको उनी आफैले खुलासा गरेका छन् ।
अमेरिकामा नागरिकता प्राप्त गर्नका लागि राम्रो नैतिक चरित्र प्रदर्शन गर्न आवश्यक छ । उनले आफूले हालै अमेरिकी नागरिकताका लागि टेस्ट दिएको, टेस्टका क्रममा आफूलाई विभिन्न प्रश्नहरु सोधिएको र आफूले उक्त टेस्ट पास गरेको बताएका छन् । तर टेस्ट पास गरेपछि पनि हालै उनलाई गाँजा सेवनबारे अर्को टेस्ट दिनुपर्ने जानकारी गराइएको छ ।
क्यानडामा जन्मिएका यी गायक आफ्नो उमेरको ६० को अन्त्यदेखि अमेरिकामा बस्दै आएका छन् । उनले आगामी मंगलबार अमेरिकी नागरिकताको सपथ लिने अपेक्षा गरेका थिए । उनी ७४ बर्षका भएका छन् । उनले आगामी निर्वाचनमा डोनाल्ड ट्रम्पलाई भोट दिन चाहेको बताएका छन् ।
हालै अमेरिकी सरकारको सिटिजनसिप एण्ड इमिग्रेशन सर्भिसेज युएससीआईएसले नयाँ नीति जारी गर्दै गाँजा सेवन लगायत यससँग सम्बन्धित गतिविधि गरेको पाइएमा अमेरिकी नागरिकता लिनमा रोक्न सकिने स्पष्ट पारेको थियो । अमेरिकी नागरिकता लिनका लागि चाहिने असल नैतिक चरित्रबारे स्पष्ट पार्दै गाँजाको सेवनको राज्यको कानुनमा अपराधका रुपमा नलिइएपनि अमेरिकी नागरिकता लिनका लागिभने सशर्त बारको रुपमा रहने युएससीआईएसले स्पष्ट पारेको थियो ।
सन् १९९६ देखि वासिंटन डिसी लगायतका कैयन राज्यहरुले गाँजाको खेती, वितरण, सेवन र बोकेर हिड्ने मेडिकल वा गैर गैरमेडिकल कृयाकलापलाई अपराधका रुपमा नलिने गरी कानुनको निर्माण गरेका छन् । तर अमेरिकाको संघीय कानुनले भने गाँजाको खेती, वितरण, सेवन र बोकेर हिड्ने कृयाकलापलाई गैरकानुनी ठहर गर्दै यस्तो गरेका कारण आप्रवासीले अपराध र अध्यागमन अवस्थाको सामना गर्नुपर्ने स्पष्ट पारेको छ ।
गाँजाबारेको गतिविधि राज्यको वा विदेशको कानुन अन्तरगत गैरकानुनी नठहरिएको अवस्थामा समेत त्यस्तो गतिविधि गरेको पाइएमा त्यस्ता आप्रवासीलाई असल नैतिक चरित्र नभएको ठहर गरेर अमेरिकी नागरिकता लिनमा रोक लगाउने युएसससीआईएसले जनाएको थियो । यद्यपी एकपटकमात्र ३० ग्राम वा त्यो भन्दा कम गाँजा सेवन, वितरण वा बोकेर हिडेको पाइएमा भने छुट दिन सकिने जनाइएको छ ।
गाँजा उद्योगमा काम गरेका कारण ग्रिनकार्डबाहकलाई नागरिकता प्रदान गर्नमा अस्वीकार गरिएको समाचार सार्वजनिक भए लगत्तै युएससीआईएसको नयाँ मेमो आएको थियो । युएससीआईएसले संघीय कानुन अनुशार काम गर्नुपर्ने भएकाले र संघीय कानुन अनुशार अमेरिकामा गाँजा अवैध भएकाले गाँजालाई असल नैतिक चरित्रको मापदण्डमा राखिएको युएससीआईएसका प्रवक्ताले जनाएका छन् ।